За мінулыя суткі ад наступстваў пажараў загінула восем чалавек

7 лютага, Позірк. За мінулыя дзяжурныя суткі (з 6:00 6 лютага па 6:00 7 лютага) ад наступстваў пажараў у Беларусі загінула восем чалавек, паведамляе Міністэрства па надзвычайных сітуацыях.

У Мінскай вобласці агонь забраў адно жыццё. Трагедыя здарылася ў Слуцку, падрабязнасці невядомыя.

Два чалавекі загінула ў Магілёўскай вобласці. Пра ахвяр пажару ў жылым доме ў вёсцы Дзераўцы (Асіповіцкі раён) — 53-гадовага мужчыну і 66-гадовую жанчыну — напярэдадні паведаміў Следчы камітэт.

Яшчэ дзве ахвяры агню — у Гомельскай вобласці. У вёсцы Рубеж (Лельчыцкі раён) пры тушэнні пажару ратавальнікі знайшлі цела гаспадара дома (1962 год нараджэння). Акрамя таго, у бальніцы памёр чалавек, які атрымаў траўмы на пажары 19 студзеня ў Гомелі.

У Брэсцкай вобласці на пажарах загінула тры чалавекі. Першы трагічны выпадак здарыўся ў вёсцы Людвінава (Драгічынскі раён), дзе загінуў сын гаспадыні гарэлага дома; другі — у вёсцы Турная (Кобрынскі раён), дзе агонь забраў жыццё бацькі ўладальніцы жылля; трэці — у Маларыце, дзе загінулы, паводле інфармацыі абласнога ўпраўлення МНС, — грамадзянін, які “самавольна трапіў” у адну з кватэр трохкватэрнага жылога дома на вул. Савецкай.

За суткі зарэгістравана 22 пажары, ад пачатку года — 648 (на 0,2% менш у параўнанні з аналагічным перыядам 2024 года, калі было 649). За гэты час загінула 94 чалавекі (+4,4%; 90), траўмавана — 56 (-5,1%; 59).