“Мінскэнерга” папярэдзіла пра магчымыя перабоі у цеплазабеспячэнні з-за прарыву трубы на захадзе сталіцы

8 лютага, Позірк. У сувязі з пашкоджаннем трубаправода квартальных цеплавых сетак у 15:30 8 лютага ў раёне станцыі метро “Спартыўная” ў наваколлях могуць быць перабоі ў цеплазабеспячэнні, папярэдзіла прадпрыемства “Мінскэнерга”.

Гэта тычыцца дамоў па вул. Прытыцкага (39, 41, 43, 45, 47, 49, 51, 59), Бельскага (24, 26), Еўфрасінні Полацкай (1, 5), Адоеўскага (70), а таксама царквы прападобнай Еўфрасінні Полацкай.

“У ліквідацыі парушэння задзейнічана дзве брыгады аварыйна-аднаўленчай службы філіялаў “Мінскія цеплавыя сеткі” РУП “Мінскэнерга”. Час аднаўлення нармальнага рэжыму цеплазабеспячэння па вышэй названых адрасах будзе паведамлена дадаткова”, — адзначыла арганізацыя.

Тэмпература паветра ў Мінску зараз — 5 градусаў марозу, уначы і раніцай 9 лютага — да 9 градусаў марозу.