Ваенныя ідэолагі фармуюць высокія духоўныя якасці насельніцтва, лічыць Хрэнін

20 лютага, Позірк. Афіцэры-ідэолагі, “знаходзячыся на вастрыі барацьбы за душы людзей, уносяць значны ўклад у фармаванне высокіх духоўных і маральных якасцей грамадзян <…>, вяршыняй якіх з’яўляецца патрыятызм”, заявіў міністр абароны Віктар Хрэнін у віншаванні з Днём органаў ідэалагічнай работы, які адзначаецца ва Узброеных сілах 20 студзеня.

“Гэты трывалы духоўна-маральны фундамент мае першараднае значэнне ў далейшым развіцці беларускай дзяржаўнасці. <…> Маральны дух вайскоўцаў і патрыятызм грамадзян ва ўсе часы мелі найважнейшае значэнне для перамогі, а ў сучасных умовах, калі ідзе актыўная бітва за свядомасць людзей, духоўны фактар ​​мае вырашальнае значэнне“, — цытуе яго прэс-служба Мінабароны.

Вынікамі ідэалагічнай працы, паводле сцвярджэння Хрэніна, з’яўляюцца “высокі ўзровень даверу народа сваёй арміі, безумоўная падтрымка асабовым складам дзяржаўнай палітыкі, яго высокі маральны дух”.

Пасля падзеяў 2020 года ідэалагізацыя і мілітарызацыя ўсіх сфер беларускага грамадства значна ўзмацнілася.

У прыватнасці, сталі масава стварацца “ваенна-патрыятычныя класы”, дзе навучаецца каля 4 тыс. дзяцей.

У маі 2022 года Аляксандр Лукашэнка падпісаў указ аб развіцці “ваенна-патрыятычных клубаў”. Дакумент рэгулюе дзейнасць такіх арганізацый для дзяцей на тэрыторыі воінскіх часцей унутраных войскаў МУС, Узброеных сіл, а таксама на тэрыторыі падраздзяленняў МНС.