Пасяджэнне Савета бяспекі ААН па сітуацыі з ударам па аўтобусе з беларускімі дзецьмі ў РФ пройдзе 29 чэрвеня
Штаб-кватэра ААН у Нью-Ёрку
27 чэрвеня, Позірк. Пасяджэнне Савета Бяспекі Арганізацыі Аб’яднаных Нацый па сітуацыі з ударам па аўтобусе з беларускімі дзецьмі ў Бранскай вобласці Расіі пройдзе на пачатку наступнага тыдня.
“Старшынства прызначыла пасяджэнне на 29 чэрвеня ў 15:00 (паводле Нью-Ёрку; паводле Мінску — у 22:00. — “Позірк”.)”, — паведаміла расійскаму агенцтву ТАСС в.а. пастаяннага прадстаўніка РФ пры ААН Ганна Еўсцігнеева.
Раней расійскі дыпламат заявіла, што РФ падтрымала запыт Беларусі на скліканне экстранага пасяджэння Савета Бяспекі наконт гэтага. Еўсцігнеева назвала атаку “наўмысным ударам УСУ па аўтобусе, які перавозіў мірных жыхароў — беларускіх грамадзян, уключаючы дзяцей”. “Разлічваем, што члены Савета Бяспекі дадуць прынцыповую ацэнку гэтаму злачынству супраць грамадзянскага насельніцтва”, — дадала яна.
26 чэрвеня прэс-сакратар МЗС Беларусі Руслан Варанкоў сказаў, што “тэрарыстычная атака на грамадзянскі аўтобус, які перавозіў беларускіх грамадзян, пераважна дзяцей”, заахвоціла Мінск звярнуцца да ААН Калумбіі, якая старшынствуе ў Савеце Бяспекі, з “просьбай аб скліканні тэрміновага пасяджэння савета”.
Паколькі Беларусь не з’яўляецца членам Савета Бяспекі, падкрэсліла знешнепалітычнае ведамства, зварот быў падтрыманы пастаянным членам савета Расіяй.
Паводле слоў Варанкова, на пасяджэнні беларускі бок “таксама прыцягне ўвагу Савета Бяспекі да нядаўніх заяў кіраўніцтва Украіны, у якіх адкрыта дэкларуецца гатоўнасць наносіць удары па тэрыторыі Беларусі, уключаючы аб’екты крытычнай інфраструктуры”.
17 чэрвеня аўтобус з выхаванцамі рэчыцкай дзіцяча-юнацкай спартыўнай школы № 2 (Гомельская вобласць) трапіў пад удар у Бранскай вобласці РФ. У транспартным сродку, які накіроўваўся з Рэчыцы ў Геленджык, знаходзілася 44 пасажыры, з іх 28 дзяцей-спартсменаў 2014–2015 гадоў нараджэння. Там жа былі ўдзельнікі мясцовай танцавальнай студыі.
Першапачаткова заяўлялася, што пацярпела восем чалавек, у тым ліку шасцёра дзяцей (расійскі бок дагэтуль прыводзіць такія звесткі). Пазней МЗС Беларусі ўдакладніла, што пацярпелых шэсць, у тым ліку пяць — дзеці. Іх шпіталізавалі ў бальніцы Бранскай вобласці (аднаму дзіцяці зробленая аперацыя). 18 чэрвеня пецярых дзяцей і аднаго дарослага з расійскіх бальніц перавезлі ў медустановы Мінска. Астатнія вярнуліся ў Рэчыцу ўвечары 17 чэрвеня.
Сярод тых, хто суправаджаў дзяцей, была жонка трэнера з Рэчыцкай ДЮСШ-2 Вікторыя Гарошка, яна загінула.
Беларусь і Расія абвінавацілі Украіну ў тым, што здарылася, Кіеў дачыненне адмаўляе. Следчы камітэт РФ 23 чэрвеня заявіў, што загад на ўдар па аўтобусе аддалі камандуючы Сіламі беспілотных сістэм УСУ Роберт Броўдзі і начальнік ГУР Мінабароны Украіны Алег Івашчанка, а непасрэднымі выканаўцамі былі вайскоўцы Ігар Жукаў, Дзмітрый Ткачэнка і Уладзіслаў Навум.
