Колькасць патанулых з пачатку 2025 года вырасла на 22% у параўнанні з аналагічным леташнім перыядам
4 сакавіка, Позірк. У Беларусі з пачатку 2025 года патанула 28 чалавек, у тым ліку адно дзіця, за аналагічны перыяд 2024-га — 23 (+21,74%), паведаміў на прэс-канферэнцыі 4 сакавіка ў Мінску памочнік міністра па надзвычайных сітуацыях, прэс-сакратар МНС Яўген Бараноўскі.
Паводле яго слоў, у 2025 годзе ад утаплення выратавана 17 чалавек.
Прадстаўнік МНС папярэдзіў, што цяпер рызыка атрымаць траўмы на вадзе расце: “Прыходзіць цяпло, лёд становіцца менш трывалым”.
“Разам з тым, мы ўжо маем пэўную групу рызыкі <…>. Па-першае, гэта, вядома, нашыя ўлюбёныя родныя рыбакі, якія рыбачаць і днём, і ўначы, што вельмі, дарэчы, не рэкамендуецца. І, вядома, гэта дзеці. <…> Нягледзячы на тое, што мы з імі актыўна праводзім розныя навучальныя прафілактычныя мерапрыемствы, разам з тым у іх пачуццё рызыкі крыху зніжанае”, — сказаў Бараноўскі.
Спікер паведаміў, што МНС і Таварыства ратавання на водах узмацнілі прафілактычную працу: праводзяць маніторынгі ўсіх вадаёмаў краіны, у тым ліку з дапамогай беспілотнікаў. Дроны, паводле яго слоў, з’яўляюцца эфектыўным сродкам, “які дазваляе за кароткі прамежак часу выявіць месцы або гуртавання рыбакоў”.