29 красавіка, Позірк. На пленарным пасяджэнні Еўрапейскай народнай партыі (ЕНП) выступіць 30 красавіка дэмакратычны лідар Святлана Ціханоўская, паведамляе яе прэс-служба.
Пленум пачаў працу ў Валенсіі (Іспанія) 29 красавіка. Адным з мерапрыемстваў стала дыскусія па Беларусі, у якой, як адзначаецца, удзельнічаў дарадца Ціханоўскай па канстытуцыйнай рэформе і парламенцкім супрацоўніцтве Анатоль Лябедзька.
Дыскусію адкрыў відэазварот дэмлідара, у якім яна падзякавала ЕНП за падтрымку.
“Дыктатарам не патрэбныя палітычныя партыі — толькі цацачныя. Таму што дыктатарам усё роўна, чаго хочуць людзі. У іх ёсць толькі адзін аргумент: адправіць сваіх палітычных апанентаў у турму”, — падкрэсліла Ціханоўская.
Паводле яе слоў, запрашэнне беларусаў на пленарнае пасяджэнне з’яўляецца “знакам таго, што ЕНП не забывае сваіх палітычных братоў і сясцёр, якія пакутуюць за тое, што падзяляюць тыя ж дэмакратычныя каштоўнасці: свабоду, народаўладдзе, вяршэнства закона”.
Паводле паведамленняў СМІ і афіцыйных крыніц, у пленуме ЕНП прымуць удзел больш за 800 дэлегатаў і 1.200 гасцей з 40 краін. Чакаюцца выступленні кіраўніцы Еўрапейскай камісіі Урсулы фон дэр Лайен, старшыні Еўрапарламента Раберты Метсолы, 15 кіраўнікоў дзяржаў і ўрадаў.
ЕНП з’яўляецца найбуйнейшай палітычнай групай у Еўрапейскім парламенце (188 месцаў з 720).
