28 красавіка, Позірк. У сувязі з доўгімі чэргамі на мяжы з Польшчай “Мінсктранс” зноў арганізаваў бясплатную перасадку пасажыраў у аўтобусы прадпрыемства, якія стаяць наперадзе.
Умовы: наяўнасць свабодных месцаў у аўтобусах і квіток да Варшавы альбо варшаўскага аэрапорта імя Шапэна. “У выпадку непрадбачаных сітуацый (адмова браць пасажыраў, спагнанне паўторнай платы і гэтак далей)“ пасажырам прапануецца пісьмова паведамляць на ўказаны нумар тэлефона па “ўсіх даступных месенджарах”.
Упершыню бясплатная перасадка была арганізаваная на фоне чэргаў у мінулыя праваслаўныя Каляды. Пра яе было абвешчана 7 студзеня.
Да 22 гадзін 28 красавіка перад адзіным функцыянуючым для пасажыраў на беларуска-польскай мяжы пунктам пропуску “Брэст“ сабралася 95 аўтобусаў. Затрымка адпраўлення аўтобусаў з Варшавы на Мінск дасягае 13 гадзін. Устаноўлена чарговасць пасадкі пасажыраў у залежнасці ад часу, пазначанага ў квітку.
Між тым у пункце пропуску “Каменны Лог“ на беларуска-літоўскай мяжы чаргі аўтобусаў цяпер няма. У 20 гадзін стаяла два аўтобусы, у 18 і 16 гадзін — тры. На працягу дня “Мінсктранс” паведаміў аб затрымцы трох аўтобусаў, якія курсуюць паміж Беларуссю і Літвой.
