За мінулы тыдзень у вадаёмах Беларусі патанула 14 чалавек

10 сакавіка, Позірк. За мінулы тыдзень (3–9 сакавіка) у вадаёмах Беларусі патанула 14 чалавек, вынікае з праведзенага “Позіркам“ аналізу даных Таварыства ратавання на водах і Міністэрства па надзвычайных сітуацыях.

Паводле інфармацыі таварыства, 6 і 7 сакавіка загінула восем чалавек (у Віцебскай вобласці — трое, Гомельскай — двое, Брэсцкай і Мінскай абласцях, а таксама Мінску — па адным). Толькі адзін трагічны выпадак лакалізаваны больш дэталёва — Слуцкі раён Мінскай вобласці.

Як вынікае з сутачных зводак МНС, 7 і 9 сакавіка было зафіксавана шэсць выпадкаў утаплення.

У Віцебскай вобласці загінула тры чалавекі: ва Ушацкім (мужчына 1959 года нараджэння) і Віцебскім (мужчыны 1968 і 1991 г.н.) раёнах.

У Лунінецкім раёне Брэсцкай вобласці ў выніку аварыі аўтамабіль вылецеў з маста, загінула дзяўчына (2007 г.н.). У Добрушскім раёне Гомельскай вобласці і Крупскім раёне Мінскай вобласці патанулі мужчыны (1980 і 1956 г.н. адпаведна).

Паводле інфармацыі прэс-сакратара МНС Яўгена Бараноўскага, з 1 студзеня па 4 сакавіка ў Беларусі патанула 28 чалавек, у тым ліку адно дзіця. За той жа перыяд 2024 года — 23 (+21,74%).

Прадстаўнік ведамства папярэдзіў, што зараз рызыка атрымаць траўмы на вадзе расце: “Прыходзіць цяпло, лёд становіцца менш трывалым”.

“Разам з тым, маем пэўную групу рызыкі <…>. Па-першае, гэта, вядома, нашы ўлюбёныя родныя рыбакі, якія рыбачаць і ўдзень, і ўначы, што вельмі, дарэчы, не рэкамендуецца. І, канешне, гэта дзеці. <…> Нягледзячы на тое, што мы з імі актыўна праводзім розныя навучальныя прафілактычныя мерапрыемствы, разам з тым у іх пачуццё рызыкі крыху зніжанае”, — сказаў Бараноўскі.

Спікер паведаміў, што МНС і Таварыства ратавання на водах узмацнілі прафілактычную працу: праводзяць маніторынгі ўсіх вадаёмаў краіны, у тым ліку з дапамогай беспілотнікаў. Дроны, паводле яго слоў, з’яўляюцца эфектыўным сродкам, “які дазваляе за кароткі прамежак часу выявіць месцы або гуртавання рыбакоў”.