Праз атаку Масквы ўкраінскімі БПЛА былі затрыманыя шэсць авіярэйсаў з Мінска

11 сакавіка, Позірк. Авіякампаніі “Белавія” і “Аэрафлот” (РФ) 11 сакавіка затрымалі адпаведна чатыры і два рэйсы з беларускай сталіцы ў Маскву, сведчыць анлайн-расклад Нацыянальнага аэрапорта Мінск.

Беларускі перавозчык не змог своечасова выканаць рэйсы B2981 ва Унукава (вылет адбыўся ў 10.40 замест запланаваных 6.50), B2975 у Шарамеццева (у 10.00 замест 7.40), B2957 у Дамадзедава (у 11.00 замест 10.00), B2987 ва Унукава (у 15.50 замест 11.50).

Расійская кампанія затрымала рэйсы ў Шарамеццева — SU1835 (у 9.10 замест 7.00) і SU1831 (у 12.30 замест 11.15).

Рэйсы “Белавія” і “Аэрафлоту” B2973 і SU1843 выправіліся з Мінска па раскладзе ў 14.50 і 15.25 адпаведна.

11 сакавіка запланаваныя яшчэ тры рэйсы ў Маскву: B2955 (Дамадзедава) у 17.35, B2977 (Шарамеццева) у 19.55 і SU1833 (Шарамеццева) у 21.10.

Паводле інфармацыі СМІ, у ноч на 11 сакавіка ўкраінскія беспілотнікі здзейснілі масіраваную атаку, ударам падвергнуліся Масква і іншыя расійскія рэгіёны. Расавіяцыя ўводзіла абарончы план “Дыван” у тым ліку ў маскоўскіх аэрапортах Дамадзедава, Шарамеццева і Унукава.

Паводле звестак Міністэрства абароны РФ, сіламі СПА было збіта 343 дроны. Мэр Масквы Сяргей Сабянін у сваім тэлеграм-канале паведаміў, што былі знішчаныя 74 беспілотныя лятальныя апараты.

Паведамлялася пра трох загінулых у выніку атакі БПЛА.

У Генеральным штабе Узброеных сіл Украіны адзначылі, што ў выніку аперацыі быў пашкоджаны Маскоўскі нафтаперапрацоўчы завод.