У лютым МАЗ прадаў у РФ амаль на 35% менш новых грузавікоў, чым год таму
13 сакавіка, Позірк. У лютым 2025 года на расійскім рынку было прададзена 290 новых грузавікоў Мінскага аўтамабільнага завода — на 34,8% менш, чым у тым жа месяцы 2024-га (445), гаворыцца ў даследаванні “АСМ-холдынг” (РФ).
Прадукцыя Мінскага аўтазавода ў лютым, як і месяцам раней, заняла 6-е месца ў спісе самых прадаваных брэндаў гэтага сегмента аўтарынку Расіі, канстатавалі эксперты. Доля на рынку склала 5,1% (4,3%).
Лідарамі продажаў у справаздачным месяцы сталі: КамАЗ –—1.501 (-9,6% да лютага 2024-га), SITRAK — 1.038 (-54,8%), ГАЗ — 518 (-12,5%), Shacman — 398 (-68,3%), FAW — 385 (-56,3%).
За два месяцы 2025 года рэалізавана 564 грузавікі (850; -33,6% у гадавым вымярэнні).
За мінулы год беларускае прадпрыемства рэалізавала ў РФ 5.719 адзінак гэтай тэхнікі (за 2023 год — 6.406; -10,7%).
Пяцёрка лідараў продажаў па выніках 2024 года: КамАЗ (23.121; -26,5% да ўзроўню продажаў 2023-га), SITRAK (19.376; -19,2%), Shacman (15.545; -25,6%), FAW (11.680; -26,3%), Dongfeng (9.990; рост у 2,1 раза).
На нарадзе па развіцці прамысловасці 9 красавіка 2024 года Аляксандр Лукашэнка заявіў, што “айчынная прадукцыя саступае аналагам як у цане, так і ў якасці”. “Доля нашых грузавых аўтамабіляў [на расійскім рынку] знізілася — да 6%”, — звярнуў увагу ён.
Лукашэнка таксама адзначыў, што пры рэалізацыі ў РФ па схеме “вытворца — генеральны імпарцёр — дыстрыбутар — дылер — канчатковы спажывец” кошт грузавой і пасажырскай тэхнікі МАЗа ўзрастае — на 20%.
15 чэрвеня 2023 года першы віцэ-прэм’ер Беларусі Мікалай Снапкоў заявіў, што рынак аўтатэхнікі Саюзнай дзяржавы “мае патрэбу ў аператыўным прыняцці спецыяльных ахоўных мер праз актыўную экспансію кітайскіх вытворцаў”.
“Гаворка не проста пра падвышэнне імпартных пошлін, тут поля для манеўру амаль няма. Я маю на ўвазе антыдэмпінгавыя і спецабаронныя захады”, — сказаў Снапкоў.
Паводле яго слоў, экспансія ўсходніх партнёраў на беларускім і расійскім рынках аўтамабільнай грузавой тэхнікі відавочная, а дынаміка іх продажу палохае.