Упраўленне СК па Гомельскай вобласці шукае перакладчыкаў на 33 мовы, у тым ліку армянскую і хіндзі — СМІ

20 кастрычніка, Позірк. Упраўленне Следчага камітэта па Гомельскай вобласці абвясціла закупку паслуг пісьмовага перакладу з 33 моў і на іх, у тым ліку ўкраінскую, польскую, літоўскую, армянскай і хіндзі. Пра гэта паведамляе “Флагшток”.

Згодна з дакументацыяй, пераклад павінен ажыццяўляцца ў кастрычніку — снежні 2026 года. Для чаго следчым спатрэбіўся пераклад на такую колькасць моў, у паперах не ўдакладняецца.

Акрамя таго, упраўленне закупляе паслугі вуснага паслядоўнага перакладу з украінскай, англійскай, іспанскай, італьянскай, нямецкай, польскай, туркменскай, турэцкай і арабскай моў.

Паводле ўмоў закупкі, перакладчык павінен прыступіць да працы на працягу дзвюх гадзін пасля звароту і быць гатовым выехаць у любы пункт Гомельскай вобласці.

Як адзначае “Флагшток”, аналагічных закупак ад упраўленняў Следчага камітэта ў іншых абласцях Беларусі пакуль не было. Раней падобныя паслугі закуплялі абласныя суды.

Магчымая прычына закупкі пісьмовага перакладу — неабходнасць накіроўваць запыты ў краіны ЕС і іншыя дзяржавы. Вусны пераклад можа спатрэбіцца падчас следчых дзеянняў з удзелам замежнікаў, якія знаходзяцца ў Гомельскай вобласці.

У красавіку 2026 года Генеральная пракуратура паведаміла пра накіраванне ў Гомельскі абласны суд крымінальнай справы замежніка, якому інкрымінаваліся забойства жонкі, замах на забойства пасынка і іншыя злачынствы.

Паводле даных Следчага камітэта, за дзевяць месяцаў 2026 года ў Віцебскай, Гродзенскай і Мінскай абласцях колькасць зарэгістраваных злачынстваў скарацілася адпаведна на 12,1%, 16,9% і 10,4% у параўнанні з аналагічным перыядам 2025 года. Дынаміку ў астатніх рэгіёнах ведамства не прывяло.