Сёмы месяц запар назіраецца запаволенне росту прамысловай вытворчасці
17 сакавіка, Позірк. Прамысловая вытворчасць у студзені — лютым 2025 года ў наяўных цэнах склала 33,3 млрд рублёў — на 2% больш, чым годам раней, сведчаць даныя Нацыянальнага статыстычнага камітэта.
Да сярэдзіны мінулага лета рост прамвытворчасці пераважна паскараўся (у студзені 2024 года вытворчасць вырасла на 5,4%, студзені — лютым — на 7,1%, студзені — сакавіку — на 6,5%, студзені — красавіку — на 7,7%, студзені — траўні — на 8%, студзені — чэрвені — на 7,1%, студзені — ліпені — на 7,5%), але пасля стаў перманентна запавольвацца (у студзені — жніўні рост вытворчасці склаў 7,1%, студзені — верасні — 6,4%, студзені — кастрычніку — 6,2%, студзені — лістападзе — 5,5%, па выніках года — 5,4%; у студзені 2025-га — 2,3%).
Такім чынам, запаволенне тэмпаў росту прамысловай вытворчасці назіраецца ўжо сем месяцаў запар.
