АПК падтрымаў ініцыятыву КР аб уключэнні грамадзян Беларусі ў спісы на абмен ваеннапалоннымі

17 сакавіка, Позірк. Аб’яднаны пераходны кабінет (АПК) на пасяджэнні 17 сакавіка падтрымаў ініцыятыву Каардынацыйнай рады (КР) аб уключэнні грамадзян Беларусі, у тым ліку цывільных асобаў, у спісы на абмен ваеннапалоннымі, паведамілі “Позірку” ў прэс-службе АПК.

КР рэкамендавала кабінету падрыхтаваць і зацвердзіць спіс для абмену, а таксама наладзіць камунікацыю з органамі ва Украіне, адказнымі за працэдуру абмену.

“Рэкамендацыя знайшла падтрымку ў кабінеце, адпаведныя даручэнні дадзеныя прадстаўніцтву па абароне і нацыянальнай бяспецы і прадстаўніцтву па транзіце ўлады”, — адзначыў супрацоўнік прэс-службы АПК (кіраўнікі адпаведна Вадзім Кабанчук і Павел Латушка).

Паводле яго слоў, прадстаўніцтва па абароне і нацыянальнай бяспецы непасрэдна зоймецца складаннем спісаў для перадачы іх адпаведным структурам з украінскага боку.

Зварот КР быў прыняты з ініцыятывы фракцыі “Каманда Латушкі і Рух “За Свабоду”. У ім адзначаецца, што шматлікія грамадзяне Беларусі былі затрыманыя і асуджаныя на працяглыя тэрміны пазбаўлення волі за падтрымку Украіны, у тым ліку за ўдзел у беларускіх добраахвотніцкіх падраздзяленнях, перадачу інфармацыі аб перамяшчэнні расійскай тэхнікі, фінансавую дапамогу і іншыя дзеянні.

КР звярнулася да ўладаў Украіны з прапановай уключыць грамадзян Беларусі ў спіс на абмен ваеннапалоннымі паводле прынцыпу “ўсіх на ўсіх”.

Зварот падтрымалі 41 з 44 дэлегатаў КР, якія ўзялі ўдзел у галасаванні. Адзін устрымаўся, двое выступілі супраць. Фракцыя “Беларусы” (ранейшая назва — “Блок Пракоп’ева — Ягорава”) не ўдзельнічала ў галасаванні.