У Беларусь “вельмі часта” залятаюць баявыя БПЛА з тэрыторыі Украіны, часам падаюць “проста паміж дамоў” — Карпянкоў

23 сакавіка, Позірк. У Беларусь “вельмі часта” залятаюць беспілотныя лятальныя апараты (БПЛА) з тэрыторыі Украіны, заявіў намеснік міністра ўнутраных спраў — камандуючы ўнутранымі войскамі (УС) Мікалай Карпянкоў.

“Гэта вось, скажам так, асаблівая тэма ў працы нашых падраздзяленняў па размініраванні”, — сказаў ён (па відэа ў ютуб-канале УС).

Карпянкоў дэ-факта прызнаў у інтэрв’ю, што беларуская сістэма абароны не спраўляецца з такімі баявымі дронамі. Іх паходжанне ён не назваў.

“Бог ахоўвае Рэспубліку Беларусь, — так намеснік кіраўніка МУС паспрабаваў растлумачыць адсутнасць цяжкіх наступстваў ад падзення дронаў на беларускай тэрыторыі. — Вось колькі яны ў палях падалі, столькі яны выбухалі. Колькі яны падалі ў населеных пунктах — Лойнікі, у Хоеве (верагодна, гаворка аб Хойніках і Лоеве, раённых цэнтрах Гомельскай вобласці. — “Позірк“.) … Вы ведаеце, яны не выбухаюць”.

“Яны вось прама паміж дамоў падаюць, на дарогу падаюць, да дома застаецца 50–60 метраў. І, вы ведаеце, яны не дэтануюць”, — дадаў намеснік міністра.

Паводле яго слоў, “немагчыма разабрацца ў гэтым дроне”. “У ім ёсць самаліквідатар. Пастаўлены ён, атрымліваецца, на самазнішчэнне <…> ці не? Без чалавека гэта вырашыць немагчыма. І ўсюды мясцовасць такая — робат не адправіш, нічога не зробіш”, — удакладніў Карпянкоў.

Паводле яго сцвярджэння, тэхнічная аснашчанасць падраздзяленняў МУС, якія процідзейнічаюць БПЛА,”падрасла”. “І сапёр па-ранейшаму ў касцюме па размініраванні падносіць рэнтген і глядзіць, атрымліваецца, што ў гэтым дроне вось знаходзіцца. Альбо аскепкава-фугасны, альбо тэрмабарычны боепрыпас. Глядзіць, дзе там слабое месца, ёсць самаліквідатар ці не. І мы іх размініруем”, — адзначыў намеснік кіраўніка ведамства.

“Вы ведаеце, нейкія дроны збіваюцца, а нейкія дроны залятаюць, і мы потым іх размініруем, — сказаў ён. — Ну, гэта вайна, гэта наступствы таго, што адбываецца ў нашым паўднёвым памежжы. Гэта адбываецца практычна кожны тыдзень”.

“Вырашыць гэтыя праблемы” дапамагаюць “удача” і “гераізм сапёраў”, таму, падкрэсліў Карпянкоў, “не разбураны ні адзін дом”.

Незалежныя інфармацыйныя рэсурсы і СМІ рэгулярна паведамляюць пра падзенне расійскіх БПЛА на тэрыторыі Беларусі.

2 сакавіка рэгіянальны сайт “Флагшток” са спасылкай на свае крыніцы паведаміў, што маштабнае адключэнне цеплазабеспячэння ў Мазыры (Гомельская вобласць) 27–28 лютага было звязана з падзеннем расійскага беспілотніка.

“Гэты інцыдэнт стаў першым верыфікаваным выпадкам, калі з-за БПЛА быў нанесены ўрон энергетычнай сістэме Беларусі. Дзеючыя ўлады вырашылі схаваць інфармацыю аб прычынах маштабнай аварыі”, — гаварылася ў матэрыяле.

Аб “пашкоджанні цеплавой магістралі дыяметрам 700 мм” афіцыйна паведамлялася 28 лютага. ДзяржСМІ і тэлеграм-канал Мінэнерга адзначалі, што “для каардынацыі дзеянняў быў створаны штаб”, аднаўленчыя работы былі “паспяхова завершаныя”, “у 03:30 цеплазабеспячэнне ўсіх спажыўцоў адноўлена ў поўным аб’ёме”.

Прычыны здарэння не называліся.

Раней “Флагшток” паведамляў, што невядомы лятальны апарат ноччу 27 лютага ўпаў на гаспадарчую пабудову ў Гомельскім раёне і выбухнуў, адбыўся пажар.

4 кастрычніка мінулага года Аляксандр Лукашэнка прызнаў факты парушэння мяжы баявымі беспілотнікамі і заявіў, што беларускі бок іх збівае незалежна, украінскія яны ці расійскія.

Перыядычна яны падаюць на будынкі.

Афіцыйныя ведамствы не каментуюць залёт расійскіх дронаў у Беларусь.

Мінск падтрымлівае Маскву ў развязанай ёю поўнамаштабнай вайне супраць Украіны.