У Гродзенскай вобласці зноў затрыманыя грамадзяне з БПЛА і метэазондам

25 сакавіка, Позірк. Пра два выпадкі выяўлення беспілотных лятальных апаратаў на прыгранічнай тэрыторыі ў Гродзенскай вобласці паведаміла прэс-служба Дзяржаўнага пагранічнага камітэта (ДПК) 25 сакавіка.

21 сакавіка ў населеным пункце Радунь Воранаўскага раёна памежнікі “падчас рэалізацыі аператыўнай інфармацыі пры сілавой падтрымцы АМАП УУС Гродзенскага аблвыканкама затрымалі беларуса”. У яго доме быў знойдзены “беспілотны лятальны апарат мультыротарнага тыпу саматужнай вытворчасці”, які канфіскаваны і дастаўлены ў Лідскі памежны атрад.

У дачыненні да затрыманага распачаты адміністрацыйны працэс за парушэнне памежнага рэжыму.

24 сакавіка ў Гродзенскім раёне паблізу вёскі Ятвезь памежнікі “паводле аператыўнай інфармацыі выявілі беларуса на аўтамабілі з прычэпам“, які паспрабаваў схавацца. Мужчына затрыманы, на месцы здарэння выяўленыя метэазонд і 29 балонаў з газам. Затрыманага збіраюцца прыцягнуць да адказнасці за “непадпарадкаванне законным патрабаванням супрацоўнікаў органаў пагранслужбы“.

У апошні час дроны і аэрастаты актыўна выкарыстоўваюць кантрабандысты, каб нелегальна дастаўляць у Літву грузы, у асноўным цыгарэты беларускай вытворчасці.

5 лютага ў шэрагу раёнах Гродзенскай вобласці, якія мяжуюць з Літвой, было затрымана чатыры грамадзяніны з БПЛА.

10 лютага паведамлялася пра затрыманне ў памежжы двух мужчын “з камплектуючымі для метэазондаў”, праз тры дні — з аэрастатамі. 3 сакавіка ДПК даў справаздачу аб затрыманні двух чалавек, якія “планавалі парушыць заканадаўства аб дзяржаўнай мяжы” ў памежжы з Літвой у Гродзенскім раёне.

10 сакавіка каля вёскі Гайцюнішкі Воранаўскага раёна памежнікі затрымалі мясцовага жыхара з дронам “саматужнай вытворчасці з двума акумулятарамі”.

20 сакавіка ДПК паведамляў пра затрыманне ў памежжы з Літвой двух беларусаў з беспілотнікам.

1 красавіка 2024 года набыў моц указ № 297 “Аб дзяржаўным уліку і эксплуатацыі грамадзянскіх беспілотных лятальных апаратаў“, які забараняе ўвоз, захоўванне, абарот, эксплуатацыю і выраб беспілотнікаў і выкарыстанне паветранай прасторы без належнага дазволу.

Акрамя таго, за “незаконнае ўтрыманне і выкарыстанне беспілотнікаў у памежнай зоне альбо памежнай паласе ” прадугледжаная адміністрацыйная адказнасць паводле арт. 24.19 КаАП — штраф да 50 базавых адзінак (да 2.100 рублёў).