BySol абвясціў збор для Цэнтра беларускай салідарнасці

27 сакавіка, Позірк. Фонд BySol 27 сакавіка абвясціў збор сродкаў для Цэнтра беларускай салідарнасці (ЦБС).

Запытаная сума складае 20.000 еўра.

Паведамляецца, што палова гэтай сумы неабходная для выплаты заробкаў настаўнікам Школы дадатковай адукацыі, праз якую “за чатыры гады прайшло больш за 1.500 дзяцей”.

Звяртаецца ўвага, што адукацыю ў школе дзеці эмігрантаў атрымліваюць бясплатна. Педагогі дапамагаюць ім “захаваць беларускую мову і культуру, нават калі вяртанне дадому немагчыма”. Акрамя гэтага, у школе аказваецца дапамога ў падрыхтоўцы да школьных іспытаў і праводзіцца “мноства іншых развіваючых заняткаў”. Таксама ў навучальнай установе “з’явілася некалькі груп для дзяцей з засмучэннямі аутыстычнага спектру”. Падкрэсліваецца, што навучанне ў праходзяць і ўкраінскія дзеці.

Яшчэ 10.000 еўра неабходныя ЦБС для пакрыцця выдаткаў на заробкі юрыстаў-кансультантаў, якія “апрацоўваюць мінімум 50 зваротаў у дзень і пры гэтым паспяваюць пісаць скаргі, абскарджванні і прадстаўляць інтарэсы беларусаў перад [польскімі] адміністрацыйнымі органамі”.

“Дзякуючы тытанічнай працы Вольгі Дабравольскай, кіраўніцы юрыдычнага дэпартамента ЦБС, беларусы ў Польшчы атрымалі тое, што раней здавалася немагчымым: гуманітарны від на жыхарства — для тых, хто не можа вярнуцца дадому; польскі праязны дакумент для ўсіх беларусаў з ВНЖ — бясплатна”, — гаворыцца ў паведамленні на сайце BySol.

Адзначаецца, што сабраныя сродкі дапамогуць ЦБС “перажыць крызісны час”. “Мы актыўна працуем над планам выратавання, вядзем перамовы з патэнцыяльнымі донарамі, але цяпер мы просім вашай дапамогі — каб працягваць дапамагаць іншым”, — цытуе фонд заяву каманды цэнтра.

Цэнтр беларускай салідарнасці — грамадская арганізацыя, якая дзейнічае ў Польшчы. Заснаваная ў 2020 годзе. У асноўным займаецца аказаннем дапамогі беларускім палітычным эмігрантам, якія вымушана пакінулі радзіму.

У Польшчы пражываюць сотні тысяч беларусаў. Іх колькасць рэзка ўзрасла пасля прэзідэнцкіх выбараў 2020 года і пачатку масавых палітычных рэпрэсій у Беларусі.