Грамадзяніна ЗША, затрыманага напярэдадні ў Беларусі ў пустым вагоне таварняка, дэпартуюць у Літву

1 красавіка, Позірк. Грамадзяніна Злучаных Штатаў Амерыкі, якога супрацоўнікі беларускай мытні затрымалі ўначы 31 сакавіка на чыгуначнай станцыі Маладзечна, пасля прыцягнення да адміністрацыйнай адказнасці дэпартуюць у Літву, паведамляе прэс-служба Дзяржаўнага пагранічнага камітэта.

Напярэдадні Дзяржаўны мытны камітэт заявіў, што 27-гадовы грамадзянін ЗША перамяшчаўся з Літвы “ў адным з парожніх вагонаў чыгуначнага саставу”.

Паводле інфармацыі Дзяржпагранкамітэта, у дачыненні да замежніка распачаты працэс “адміністрацыйны працэс за незаконнае перасячэнне дзяржаўнай мяжы”.

Падчас папярэдняга разбіральніцтва, як сцвярджаецца, высветлена, што 24 сакавіка мужчына двойчы спрабаваў уехаць на тэрыторыю Беларусі — спачатку праз пункт пропуску Каменны Лог (з літоўскага боку — Мядзінінкай), а потым праз пагранпераход Беняконі (Шальчынінкай).

Пры праходжанні памежнага кантролю ён “не змог пацвердзіць наяўнасць сродкаў, неабходных для пакрыцця выдаткаў па яго знаходжанні ў Рэспубліцы Беларусь і выезду з <…> краіны, у сувязі з чым яму было адмоўлена ва ўездзе”.