Мінск 14:35

На беларуска-літоўскай мяжы затрымалі грамадзяніна Латвіі з забароненымі рэчывамі

Відэа: прэс-служба Дзяржпагранкамітэта / Стоп-кадр: "Позірк"

2 красавіка, Позірк. Грамадзяніна Латвіі з забароненымі рэчывамі, які накіроўваўся з Літвы ў Беларусь, затрымалі ўначы 31 сакавіка, паведамляе Дзяржаўны памежны камітэт.

Паводле інфармацыі ведамства, пры праходжанні кантролю ў пункце пропуску Беняконі (з літоўскага боку — Шальчынінкай) прамежнікі выявілі ў мужчыны ёмістасці з курыльнай сумессю з утрыманнем канопляў, а таксама таблеткі з псіхатропным рэчывам.

Сцвярджаецца, што замежнік “паспрабаваў схаваць наркотыкі і псіхатропы ў скрынцы з-пад соку, якая знаходзілася ў яго багажы”. “Падчас апытання стала вядома, што грамадзянін Латвіі планаваў выкарыстоўваць забароненыя рэчывы ў асабістых мэтах”, — гаворыцца ў паведамленні.

Затрыманы перададзены супрацоўнікам Воранаўскага РАУС (Гродзенская вобласць) для далейшага разбіральніцтва.

Дзяржпагранкамітэт нагадаў, што “за незаконнае перамяшчэнне праз дзяржаўную мяжу наркатычных сродкаў і псіхатропных рэчываў прадугледжана крымінальная адказнасць (артыкул 3281 КК)”, парушальніку закона “пагражае пазбаўленне волі на тэрмін да 7 гадоў”.

Ведамства таксама заявіла пра неабходнасць правяраць “склад прадуктаў і лекавых сродкаў, якія набываюцца за мяжой”.

Леьась 29 ліпеня стала вядома пра затрыманне ў Беларусі трыма днямі раней чацвярых маладых людзей з Латвіі, у машыне якіх нібыта была знойдзена марыхуана.

Аднак 12 жніўня намеснік начальніка ўпраўлення спецыяльных экспертыз упраўлення Дзяржаўнага камітэта судовых экспертыз па Віцебскай вобласці Юрый Казлоў паведаміў, што ў замежных грамадзян не было знойдзена “наркатычных сродкаў, псіхатропных рэчываў, іх аналагаў і прэкурсораў, якія падлягаюць дзяржаўнаму кантролю ў Рэспубліцы Беларусь”. Затрыманыя былі вызваленыя і вярнуліся на радзіму.

Паведамлялася, што пасля затрымання яны спачатку знаходзіліся ў ізалятары часовага ўтрымання, а потым “пад падпіскай аб нявыездзе ў адной з гасцініц”.

У сувязі з інцыдэнтам МЗС Латвіі, як і раней, рэкамендаваў сваім грамадзянам устрымацца ад паездак у Беларусь. На думку ведамства, падарожнікі могуць падпасць пад правакацыі з боку беларускіх службаў, быць ілжыва абвінавачаныя ў парушэнні беларускага заканадаўства і арыштаваныя. Магчымасці Латвіі па аказанні дапамогі такім людзям “вельмі абмежаваныя”, гаварылася ў публікацыі.

Падзяліцца: