У жыхара Краснапольскага раёна канфіскаваная бельгійская стрэльба XIX стагоддзя
3 красавіка, Позірк. Рарытэтную зброю канфіскавалі супрацоўнікі міліцыі ў жыхара Краснапольскага раёна (Магілёўская вобласць), вынікае з паведамлення прэс-службы Дзяржаўнага камітэта судовых экспертыз (ДКСЭ).
Паводле інфармацыі ведамства, мужчына — паляўнічы, але дазвол мае толькі на захоўванне гладкаствольнай паляўнічай стрэльбы.
У яго арсенале выявілі незарэгістраваную “паляўнічую стрэльбу G. Kopplin Zulltchau”, вырабленую ў другой палове XIX стагоддзя ў Бельгіі. Экспертыза паказала, што яно прыдатнае “для стрэлаў з правага ствала”.
Адзначаецца, што гэта стрэльба, хутчэй за ўсё, вырабленая на замову ў невялікай колькасці, паколькі ў спецыяльнай літаратуры няма згадак пра вытворцу. Падобны асобнік зброі, выраблены гэтым бельгійскім майстрам, захоўваецца ў Дзяржаўным гістарычным музеі ў Маскве, звярнуў увагу ДКСЭ.
У мужчыны таксама знайшлі “аўтаматычны пісталет Mod. 1935A” калібра 7,65 мм, выраблены ў XX стагоддзі ў Францыі. Для стральбы ён аказаўся непрыдатны праз карозію.
Паляўнічы паведаміў, што пісталет “выпадкова адкапаў” у сваім агародзе, а бельгійская стрэльба яму дасталася ад бацькі, той прывёз яе з Германіі.
Сярод іншага выяўленыя патроны і порах.
Краснапольскі раённы аддзел Следчага камітэта ўзбудзіў у дачыненні да мужчыны крымінальную справу.
Судовыя эксперты нагадалі, што ў выпадку выяўлення зброі і боепрыпасаў трэба паведаміць пра знаходку па нумары 102. Браць у рукі знойдзеную зброю небяспечна.
Міністэрства ўнутраных спраў раней неаднаразова папярэджвала, што санкцыя за “незаконныя дзеянні ў дачыненні да агнястрэльнай зброі, боепрыпасаў і выбуховых рэчываў” — да 12 гадоў пазбаўлення волі. Асобы, якія добраахвотна здалі зброю і боепрыпасы, што незаконна захоўваюцца, вызваляюцца ад крымінальнай адказнасці.
У жыхароў Беларусі перыядычна знаходзяць незарэгістраваную зброю і боепрыпасы.
31 студзеня МУС паведамляла, што арсенал агнястрэльнай і пнеўматычнай зброі вынялі ў 53-гадовага жыхара Мінскай вобласці. Дома ў мужчыны выявілі даўгаствольны карабін, дзве вінтоўкі, баявы рэвальвер, пісталет, гладкаствольную паляўнічую стрэльбу, пнеўматычны пісталет, пнеўматычную вінтоўку, а таксама каля 50 састаўных частак зброі, больш як 1,7 тыс. боепрыпасаў, каля 2,5 кг пораху. Акрамя таго, у яго былі афіцэрскі пяхотны корцік Вермахта ўзору 1935 года, два ручныя металашукальнікі і прадметы з месцаў баёў часоў Другой сусветнай вайны.
Больш за 700 адзінак зброі пазбавіліся беларусы ў выніку асноўнага этапа аперацыі “Арсенал” 7–11 кастрычніка 2024 года. З абароту было выключана “больш за 85 адзінак” незарэгістраванай агнястрэльнай зброі і больш за 7 тыс. боепрыпасаў рознага калібру.
За дзесяць месяцаў мінулага года міліцыя забрала ў жыхароў Беларусі каля 2 тыс. адзінак зброі і больш за 60 тыс. боепрыпасаў.