Толькі ў Гомельскай вобласці няма абмежаванняў на наведванне лясоў — Мінлясгас

3 красавіка, Позірк. Абмежаванне на наведванне лясоў дзейнічае ва ўсіх раёнах Віцебскай і Гродзенскай абласцей, сведчыць інтэрактыўная мапа на сайце Міністэрства лясной гаспадаркі.

Абмежаванні таксама ўведзеныя па ўсёй Брэсцкай вобласці, акрамя Ганцавіцкага, Іванаўскага, Камянецкага, Лунінецкага і Пінскага раёнаў.

У Мінскай вобласці дзейнічаюць абмежаванні на наведванне лясоў у Барысаўскім, Вілейскім, Валожынскім, Дзяржынскім, Капыльскім, Мінскім, Маладзечанскім, Мядзельскім, Слуцкім, Смалявіцкім, Стаўбцоўскім ды Уздзенскім раёнах.

У Магілёўскай вобласці наведванне лясоў не абмежаванае нідзе, акрамя Шклоўскага раёна.

Па ўсёй Гомельскай вобласці лясы можна наведваць свабодна.

Абмежаванне азначае, што ў лясы нельга заязджаць на аўтамабілі і разводзіць там вогнішчы. Даступныя пешыя прагулкі і збор ягад і грыбоў.

За парушэнне пажарнай бяспекі прадугледжаная адказнасць паводле арт. 15.29. КаАП (штраф для фізічных асоб — да 25 базавых велічынь, або 1.050 рублёў).

Паводле аператыўных даных Міністэрства па надзвычайных сітуацыях, з 6:00 2 красавіка да 6:00 3 красавіка ў Беларусі ліквідавана сем лясных пажараў на агульнай плошчы 64,4 га і 103 пажары травы і кустоў на агульнай плошчы 16,721 га.

З сямі лясных пажараў (Гродзенская вобласць — пяць, Мінская — два) тры ліквідавана сіламі Мінлясгаса, адзін — сіламі МНС, чатыры — сумесна Мінлясгасам і МНС (з іх адзін з прыцягненнем Узброеных сіл). Для ліквідацыі лясных пажараў задзейнічалі 51 адзінку тэхнікі і 226 чалавек.

У 2024 годзе амаль 60% усіх лясных пажараў выяўлена з дапамогай аўтаматычнай сістэмы відэаназірання, у лясах працуе 400 камер, паведаміў намеснік начальніка ўпраўлення лясной гаспадаркі Мінлясгаса Віктар Звяртоўскі на прэс-канферэнцыі 19 сакавіка.

Паводле яго слоў, сярэдняя плошча ляснога пажару летась склала 0,7 га.