Урад зацвердзіў палажэнне аб абмене з Расіяй звесткамі аб іншаземцах з трэціх краін

4 красавіка, Позірк. Палажэнне аб парадку функцыянавання інфармацыйнай сістэмы абмену звесткамі, прынятае ў развіццё падпісанага 12 сакавіка Аляксандрам Лукашэнкам указа № 107, зацверджана ўрадам 31 сакавіка.

Адпаведная пастанова размешчана 4 красавіка на Нацыянальным прававым інтэрнет-партале.

Згодна з дакументам, у згаданую інфармацыйную сістэму “перадаюцца і ў ёй.

апрацоўваюцца“ наступныя звесткі: аб дакументах для наведвання міжнародных мерапрыемстваў;

аб візах і аб ануляваных візах Беларусі і РФ; перасячэнні дзяржаўных межаў абедзвюх краін; відах на жыхарства ў іх і прызнаных несапраўднымі відах на жыхарства; дазволах і ануляваных дазволах на часовае пражыванне ў Беларусі і РФ; пастаноўцы на міграцыйны ўлік і зняцці з міграцыйнага ўліку ў Расіі; тэрміны рэгістрацыі, падаўжэнне часовага знаходжання, скарачэнне тэрміну часовага знаходжання ў Беларусі.

Пагадненне аб узаемным прызнанні віз, у развіццё якога прыняты згаданыя вышэй указ і пастанова ўрада, было падпісана 19 чэрвеня 2020 года, пачало дзейнічаць 11 студзеня 2025-га.

Як паведамляла беларускае Міністэрства замежных спраў, дакумент рэгулюе парадак “перасячэння замежнымі грамадзянамі і асобамі без грамадзянства сумеснай мяжы” Саюзнай дзяржавы, у тым ліку “сухапутнага ўчастка, які да гэтага быў адкрыты толькі для грамадзян Беларусі і Расіі”.

Падпісанты пагаднення абавязаліся прызнаваць “візы, якія даюць права на ўезд і знаходжанне на тэрыторыі” кожнага з бакоў, а таксама “адзнакі аб перасячэнні знешняй граніцы Саюзнай дзяржавы”.

Замежныя грамадзяне і асобы без грамадзянства, якія маюць візу Беларусі або РФ, могуць перасякаць межы любой з гэтых дзяржаў па пасведчанні асобы на працягу ўсяго тэрміну дзеяння візы.

МЗС звяртала ўвагу на тое, што для ўкраінскіх грамадзян захоўваецца “асаблівы парадак уезду” ў РФ. “Згодна з рашэннем урада Расійскай Федэрацыі, грамадзяне Украіны ўязджаюць у Расію праз пункт пропуску ў маскоўскім аэрапорце Шарамеццева і аўтамабільны пункт пропуску Лудонка ў Пскоўскай вобласці”, – тлумачыла міністэрства.

Адзначалася, што кожны з бакоў “захоўвае за сабой права адмовіць ва ўездзе або скараціць тэрмін знаходжання на сваёй тэрыторыі любога замежнага грамадзяніна або асобы без грамадзянства, а таксама ажыццяўляць праверку выканання імі правілаў уезду, выезду, транзіту або рэжыму знаходжання”.

Пагадненне было названа “важным складальнікам адзінай міграцыйнай прасторы Саюзнай дзяржавы”.