Мінск 02:40

МАРГ выявіў парушэнні ва ўсіх правераных крамах сеткі “7 пятніц”

Крыніца: МАРГ

4 красавіка, Позірк. Ва ўсіх правераных крамах рознічнай сеткі “7 пятніц” (належыць ТАА “ЮніСтор Груп”) выяўленыя парушэнні заканадаўства аб гандлі і абароне правоў спажыўцоў, паведамляе прэс-служба Міністэрства антыманапольнага рэгулявання і гандлю (МАРГ).

Заяўляецца, што на ўсіх аб’ектах “не выконваўся пералік тавараў, абавязковых да наяўнасці для рэалізацыі”, “адсутнічалі цэннікі на тавар, які прадаваўся” і г.д.

У дзвюх крамах, у Мінску і Магілёве, правяраючыя канфіскавалі з продажу тавары з пратэрмінаваным тэрмінам прыдатнасці.

ТАА “ЮніСтор Груп” у трохдзённы тэрмін павінна ліквідаваць парушэнні, гаворыцца ў паведамленні.

Паводле даных Гандлёвага рэестра, на тэрыторыі Беларусі згаданым таварыствам адкрыта больш за 200 гандлёвых аб’ектаў.

10 сакавіка МАРГ паведаміў, што парушэнні правілаў гандлю ўстаноўленыя амаль у кожнай трэцяй праверанай краме сеткі “Табакерка”, якая належыць СЗАТ “ЭНЕРГА-ОЙЛ”.

28 лютага МАРГ праінфармаваў пра парушэнні правілаў гандлю, выяўленых ва ўсіх правераных крамах сеткі “Хіт!”, якая належыць ТАА “Еўрагандль”.

20 лютага ведамства ўказала на парушэнні ў 96% гандлёвых аб’ектаў рознічнай сеткі “Капеечка”.

Раней МАРГ выставіў маштабныя прэтэнзіі да інтэрнэт-пляцоўкі “Вайлдберыз” і гандлёвай сеткі “Суседзі”.

14 студзеня ведамства ўзначаліў былы дыпламатычны работнік і былы першы намеснік міністра гандлю Артур Карповіч.

Падзяліцца: