Падлетак загінуў у выніку выбуху боепрыпасу ў Брэсцкім раёне

5 красавіка, Позірк. Падлетак загінуў у выніку выбуху “нявызначанага боепрыпасу” ўвечары 4 красавіка на дваровай тэрыторыі ў аграгарадку Страдзеч (Брэсцкі раён), паведамляе прэс-служба Следчага камітэта.

“У зоне паражэння апынуліся мужчына і яго ўнукі (14 і 15 гадоў), — паведамляе ведамства. — Ад атрыманых траўм адзін з падлеткаў памёр. Пенсіянеру і другому дзіцяці экстрана аказваецца медыцынская дапамога”.

У грудзе металалому ў двары дома следчыя знайшлі корпус боепрыпасу. Яны вынялі рэчавыя доказы і дапыталі сведкаў.

Распачатая крымінальная справа паводле ч. 2 ст. 295 КК (незаконныя дзеянні ў дачыненні да выбуховых рэчываў). Следчыя высвятляюць “паходжанне снарада і ўсе акалічнасці трагедыі”.