У Рагачоўскім раёне распачатая крымінальная справа за крадзеж і вываз у “суседнюю краіну” 220 тон угнаенняў

27 красавіка, Позірк. Аб выяўленні ў Рагачоўскім раёне (Гомельская вобласць) схемы крадзяжоў мінеральных угнаенняў паведамляе прэс-служба Міністэрства ўнутраных спраў.

“Устаноўлена: з тэрыторыі арганізацыі, якая ажыццяўляе захоўванне і размеркаванне ўгнаенняў, яны паступалі не на аграпрадпрыемствы, а вывозіліся па падробленых дакументах у суседнюю краіну для продажу. Фігурантамі апынуліся 53-гадовы заснавальнік фірмы, яго 49-гадовы знаёмы, а таксама двое работнікаў сельгаспрадпрыемстваў”, — гаворыцца ў паведамленні.

“Суседняя краіна” не называецца.

Адзначаецца, што ўсяго “было скрадзена каля 220 т мінеральных угнаенняў”, цяпер “значная іх частка канфіскаваная”.

“Следчымі ўзбуджаная крымінальная справа за крадзеж у асабліва буйным памеры, здзейснены групай асоб па папярэдняй змове”, — адзначылі ў ведамстве.

У 2024 годзе чвэрць усіх эканамічных злачынстваў была здзейсненая ў сельскай гаспадарцы, паведаміў 31 сакавіка намеснік міністра ўнутраных спраў Генадзь Казакевіч.

“У бягучым годзе ў названай сферы ўжо распачата 66 крымінальных спраў за крадзяжы, хабары, утойванне падзяжу [буйной рагатай жывёлы]”, — падкрэсліў намеснік кіраўніка МУС.