У рамках праверкі боегатоўнасці ваеннаабавязаныя праводзяць вучэнні з радыяцыйнай і хімічнай абаронай на мясцовасці

9 красавіка, Позірк. Пра чарговыя камандна-штабныя вучэнні ў рамках праверкі боегатоўнасці Узброеных сіл паведамляе Міністэрства абароны.

Вучэнні праходзяць у 8-й брыгадзе радыяцыйнай, хімічнай і біялагічнай абароны УС, якая базуецца ў Старых Дарогах (Мінская вобласць).

“Вайскоўцы праводзяць аэразольную маскіроўку раёна, ажыццяўляюць радыяцыйную і хімічную разведку на мясцовасці, вызначаюць межы зон заражэння, а таксама праводзяць спецыяльную апрацоўку асабістага складу і ўзбраення, ваеннай і спецыяльнай тэхнікі, якія падвергліся ўмоўнаму заражэнню. Таксама ў вучэнні ўдзельнічаюць ваеннаабавязаныя, прызваныя з запасу”, — гаворыцца ў рэлізе.

Пры выкананні шэрагу задач, заявілі ў Мінабароны, падраздзяленні войскаў радыяцыйнай, хімічнай і біялагічнай абароны (РХБА) “задзейнічаюць беспілотныя лятальныя апараты, ствараюць дымавыя заслоны, ажыццяўляюць скід запальнай сумесі”.

Паводле слоў начальніка войскаў РХБА Вячаслава Старкова, камандаванне “пастаянна вывучае досвед правядзення “спецыяльнай ваеннай аперацыі”, які затым “знаходзіць адлюстраванне ў тактыцы дзеянняў воінскіх частак і падраздзяленняў войскаў радыяцыйнай, хімічнай і біялагічнай абароны”.

“У першую чаргу гэта датычыцца прымянення беспілотных лятальных апаратаў для выканання задач РХБ-абароны. Беспілотная авіяцыя значна павышае эфектыўнасць рашэння задач”, — сказаў Старкоў.

Акрамя іншага, паводле яго слоў, на вучэннях адпрацоўваюцца “стральба са штатнай стралковай зброі з выкарыстаннем розных прылад тыпу турэляў і ужываннем паляўнічых стрэльбаў”.

“Асабісты склад падчас правядзення камандна-штабнога вучэння дэманструе ўпэўненыя прафесійныя навыкі. Варта адзначыць ваеннаабавязаных, прызваных на ваенныя зборы. Іх удзелу ў камандна-штабным вучэнні папярэднічала сур’ёзная падрыхтоўка на штатных воінскіх пасадах. Адзначаецца іх добрасумленнае стаўленне да выканання службовых абавязкаў, адказнасць пры вырашэнні задач”, — рапартаваў военачальнік.

Трэці месяц запар улады правяраюць баявую гатоўнасць арміі. Першая праверка боегатоўнасці была абвешчаная 3 лютага. Фактычна без выразнага завяршэння першай пачалася другая — 24 сакавіка.

Рэжым Аляксандра Лукашэнкі безупынна праводзіць вучэнні, трэніроўкі, зборы на фоне абвастрэння адносін з Захадам і поўнамаштабнай вайны Расіі супраць Украіны, у якой афіцыйны Мінск падтрымлівае Крэмль.