Летась КДК выявіў 89 карупцыйных злачынстваў у эканамічнай сферы
23 красавіка, Позірк. Камітэт дзяржаўнага кантролю (КДК) у 2024 годзе выявіў 89 карупцыйных злачынстваў у эканамічнай сферы і яшчэ 76 — па фактах неабгрунтаванага пасярэдніцтва, паведаміў 23 красавіка ў парламенце старшыня КДК Васіль Герасімаў.
Паводле слоў чыноўніка, супрацоўнікі камітэта летась “на сталай аснове праводзілі аператыўнае вывучэнне дзейнасці шэрагу найважнейшых для эканомікі краіны прадпрыемстваў”.
Герасімаў паведаміў, што ў 2024 годзе органы фінансавых расследаванняў КДК выявілі 271 злачынства па фактах ухілення ад выплаты падаткаў. Ён адзначыў, што гэта 94,4% выяўленых “усімі праваахоўнымі органамі” злачынстваў адпаведнай катэгорыі.
Паводле слоў старшыні камітэта, была спынена “злачынная схема адмывання сродкаў, выкрадзеных ашуканцамі ў грамадзян Рэспублікі Беларусь на падставе інвеставання ў каштоўныя паперы і крыптавалюты”.
“На замову асоб, што здзейснілі махлярства, беларускія грамадзяне, якія дапамагалі ім, накіравалі выкрадзеныя грашовыя сродкі ў суме 4 мільёны рублёў на набыццё крыптавалюты, якую пасля адправілі замоўцам. Такім чынам, выкрадзеныя грашовыя сродкі былі легалізаваныя. У дачыненні да беларусаў, якія здзейснілі адмыванне злачынных даходаў, узбуджаная крымінальная справа”, — паведаміў Герасімаў.
Дэпартамент фінансавых расследаванняў КДК, паводле слоў спікера, выявіў 121 злачынства ў выглядзе выдачы заробка “ў канвертах”. “Шэрыя заробкі”, адзначыў ён, атрымлівала каля 3,5 тыс. работнікаў.
У 2024 годзе, як паведамляла Генпракуратура, зафіксавана 1.031 карупцыйнае злачынства. Найбольшую долю склала хабарніцтва (45,1%), больш як 70% выпадкаў выяўлена ў закупачнай дзейнасці, крадзяжу шляхам злоўжывання службовымі паўнамоцтвамі (32,8%). Да крымінальнай адказнасці прыведзена 911 асобаў, з іх 14 “займалі адказнае становішча”. Найбольшая колькасць карупцыйных злачынстваў зафіксаваная ў сельскай гаспадарцы, прамысловасці, будаўніцтве і гандлі.
У лютым прэс-служба Вярхоўнага суда паведамляла, што за здзяйсненне карупцыйных злачынстваў у 2024 годзе было асуджана 709 чалавек — на 1,1% менш, чым у 2023 годзе (717).
Згодна з апублікаваным сёлета ў лютым “Індэксам успрымання карупцыі”, які штогод вылічаецца міжнароднай няўрадавай арганізацыяй Transparency International, у Беларусі сітуацыя з карупцыяй пагаршаецца чацвёрты год запар.
Індэкс вызначаецца на аснове ўспрымання ўзроўню карупцыі экспертамі і прадстаўнікамі бізнесу 180 краін і тэрыторый. Дзяржавам прысвойваюць балы — ад 0 (сур’ёзная карупцыя) да 100 (поўная адсутнасць карупцыі).
Па выніках 2024 года Беларусь набрала 33 балы (у 2023-м — 37, у 2022-м — 39, у 2021-м — 41, у лепшым для сябе 2020-м — 47) і падзяліла 114 месца (годам раней 98-е) з Босніяй і Герцагавінай, Лаосам, Манголіяй, Сьера-Леонэ, Панамай і Філіпінамі.
Аляксандр Лукашэнка прыйшоў да ўлады ў сярэдзіне 1990-х гадоў шмат у чым дзякуючы вобразу барацьбіта з карупцыяй і працягвае выкарыстоўваць гэтую тэму. За 30 гадоў карупцыя так і не была пераможана.
У сваім выступе пасля цырымоніі інаўгурацыі 25 сакавіка, заступаючы на сёмы тэрмін Лукашэнка паабяцаў працягнуць “бязлітасную барацьбу з бюракратызмам і карупцыяй”.