Дэлегацыя ўрада Беларусі не змагла вылецець у Татарстан — з меркаванняў бяспекі там закрывалі аэрапорты

23 красавіка, Позірк. Урадавая дэлегацыя Беларусі не вылецела ў Татарстан (Расія), паведаміла 23 красавіка каля 9:30 прэс-служба Савета міністраў.

Паводле інфармацыі ўрада, “аэрапорт прызначэння часова не прымае і не адпраўляе рэйсы”, паколькі для “гарантавання бяспекі палётаў грамадзянскіх паветраных судоў уведзеныя абмежаванні на палёты”.

Чакалася, што ў Татарстане пройдуць перагаворы прэм’ер-міністра Беларусі Аляксандра Турчына і кіраўніка расійскага рэгіёну Рустама Мініханава. Планавалася падпісанне двухбаковых дакументаў, наведванне ключавых прамысловых прадпрыемстваў Набярэжных Чалноў, Ніжнякамска і Елабугі.

Федэральнае агенцтва паветранага транспарту РФ (Расавіяцыя) раней паведаміла, што раніцай 23 красавіка для гарантавання бяспекі зачыненыя аэрапорты Казані, Ульянаўска і Ніжнякамска (Татарстан). Аэрапорт Ульянаўска адкрылі для палётаў у 9:41 паводле мясцовага часу. У 10:00 знятыя абмежаванні ў аэрапорце Казані.

Паводле інфармацыі расійскіх СМІ, падобныя абмежаванні ўводзяцца, як правіла, праз пагрозу нападу беспілотнікаў.

Згодна з раскладам на сайце нацыянальнага аэрапорта Мінск, на 13:10 запланаваны рэйс у Казань.

На нарадзе Савета міністраў 22 красавіка адзначалася, што Татарстан — адзін з важных эканамічных партнёраў Беларусі сярод расійскіх рэгіёнаў. Паводле інфармацыі ўрада, ён займае 9-е месца паводле тавараабароту і 8-е месца паводле аб’ёмаў экспарту.