Беларускія фехтавальшчыкі дапушчаныя да камандных міжнародных спаборніцтваў пад нейтральным сцягам

7 траўня, Позірк. Міжнародная федэрацыя фехтавання (FIE) дазволіла спартсменам з Беларусі і Расіі ўдзельнічаць у камандных спаборніцтвах пад сваёй эгідай, паведамляе прэс-служба арганізацыі.

Прадстаўнікі дзвюх краін змогуць спаборнічаць у нейтральным статусе, каманды будуць выступаць пад сцягам FIE.

Першым стартам у гэтым годзе стане чэмпіянат Еўропы, які пройдзе 14–19 чэрвеня ў Генуі (Італія). Далей адбудзецца чэмпіянат свету — 22–30 ліпеня ў Тбілісі (Грузія).

28 лютага 2022 года Міжнародны алімпійскі камітэт (МАК) на фоне распачатай вайны ва Украіне заклікаў міжнародныя спартыўныя федэрацыі не дапускаць да спаборніцтваў атлетаў з РФ і Беларусі. Гэтая рэкамендацыя была неадкладна і масава прынятая да выканання, у выніку чаго расійскі і беларускі спорт апынуўся амаль у поўнай ізаляцыі ад знешняга свету.

25 студзеня 2023 года выканкам МАК пацвердзіў санкцыі, уведзеныя ў дачыненні да Беларусі і РФ праз вайну супраць Украіны, аднак адзначыў, што ніводнаму спартсмену нельга забараняць удзельнічаць у спаборніцтвах “толькі праз яго пашпарт”. Пасля чаго ў міжнароднай спартыўнай супольнасці пачалося абмеркаванне варыянту допуску беларускіх і расійскіх атлетаў на Алімпійскія гульні 2024 года ў Парыжы.

28 сакавіка 2024 МАК выпусціў заяву, у якой рэкамендаваў міжнародным федэрацыям па відах спорту дазволіць беларусам і расіянам удзельнічаць у індывідуальных міжнародных спаборніцтвах у нейтральным статусе. З аналагічнымі ўмовамі камітэт дапусціў індывідуальных спартсменаў з Беларусі і Расіі да ўдзелу ў летніх Алімпійскіх гульнях-2024.

Пасля заявы МАК некаторыя міжнародныя федэрацыі, у тым ліку па фехтаванні, дазволілі беларусам удзельнічаць у індывідуальных спаборніцтвах.

На летняй Алімпіядзе-2024 у Парыжы абмежаваная колькасць беларускіх атлетаў, якія выступалі ў нейтральным статусе, заваявалі чатыры медалі — залаты, два сярэбраныя і бронзавы, заняўшы віртуальнае 50-е месца ў агульным заліку.

Беларускія фехтавальшчыкі ў Парыжы не выступалі.