У бальніцы памёр 8-гадовы хлопчык, які пацярпеў у ДТЗ у Светлагорскім раёне

5 жніўня, Позірк. Пра смерць у бальніцы 8-гадовага хлопчыка, які пацярпеў у выніку дарожна-транспартнага здарэння ў Светлагорскім раёне (Гомельская вобласць), паведаміў часова выконваючы абавязкі начальніка ДАІ МУС Андрэй Гаркуша.

Яго відэакаментарый апублікавала прэс-служба ведамства. Са слоў Гаркушы вынікае, што ў момант аварыі дзіця знаходзілася ў легкавым аўтамабілі.

Кіраўнік ДАІ, які прыбыў на месца ДТЗ, пацвердзіў, што аварыя здарылася 5 жніўня каля 15:00 на 18-м км аўтадарогі Н-5011 Светлагорск — Сасновы бор — Палессе. Паводле папярэдняй інфармацыі, 46-гадовы кіроўца аўтамабіля “Мазда” выехаў на паласу сустрэчнага руху і сутыкнуўся з грузавіком “МАЗ”.

Гаркуша ўдакладніў, што апошнім кіраваў 29-гадовы кіроўца.

Ён таксама пацвердзіў, што ў выніку ДТЗ на месцы аварыі загінулі кіроўца легкавога аўтамабіля і два яго пасажыры — 11-гадовая дзяўчынка і 78-гадовая жанчына.

Такім чынам, у медустанове застаецца дастаўленая туды 51-гадовая жанчына — пасажыр легкавога аўтамабіля.

Агульная колькасць ахвяр ДТЗ узрасла да чатырох, уключаючы дваіх дзяцей.

Следчы камітэт паведаміў аб узбуджэнні па факце ДТЗ крымінальнай справы паводле ч. 3 арт. 317 Крымінальнага кодэкса (парушэнне правілаў дарожнага руху або эксплуатацыі транспартных сродкаў, што пацягнула па неасцярожнасці смерць двух і больш асоб).

Пры гэтым СК адзначыў, што ў выніку аварыі загінулі члены адной сям’і: 46-гадовы мужчына, яго 11-гадовая дачка і 78-гадовая цешча. Памерлы ў бальніцы 8-гадовы хлопчык быў пляменнікам 51-гадовай жонкі кіроўцы, якая знаходзіцца ў медустанове.