Амаль на чвэрць скарацілася колькасць замежных дзяцей, якія летам адпачнуць у “Зубрані” за кошт Мінска

13 траўня, Позірк. Распараджэнне аб выдаткоўванні грашовых сродкаў для арганізацыі адпачынку 314 дзяцей з Алжыра, Егіпта, Індыі, Кітая, Лаоса, М’янмы, Палестыны, Кыргызстана, Узбекістана і Курскай вобласці Расіі ў Нацыянальным дзіцячым адукацыйна-аздараўленчым цэнтры “Зубраня” падпісаў Аляксандр Лукашэнка, паведамляе яго прэс-служба 13 траўня.

Адзначаецца, што “падчас знаходжання ў Беларусі дзеці пройдуць медыцынскі агляд, атрымаюць неабходнае санаторна-курортнае лячэнне, наведаюць культурныя мерапрыемствы і знакавыя гістарычныя аб’екты ў Мінску і рэгіёнах”.

Згодна з дакументам, размешчаным на сайце Лукашэнкі, “Зубраня” прыме 92 дзяцей і васьмярых суправаджаючых асоб з Кітая, 30 дзяцей і траіх суправаджаючых з Курскай вобласці. Астатнія дзяржавы накіруюць па 24 дзіцяці і двух дарослых з імі.

У 2024 годзе аналагічная праграма ахоплівала адпачынак 413 дзяцей, гэта значыць на 99 больш, чым плануецца прыняць гэтым летам. Больш за палову з іх (225) тады накіравала Сірыя. Кітай, як і сёлета, атрымаў 92 месцы, па 24 атрымалі Егіпет, Лаос, Узбекістан і Кыргызстан.

Такім чынам, у параўнанні з мінулым годам, гэтым летам “Зубраня” не будзе прымаць на аздараўленне дзяцей з Сірыі, аднак спіс папоўнілі Алжыр, Індыя, М’янма, Палестына і Курская вобласць РФ.

Паводле прэс-службы Лукашэнкі, дзяцей з іншых дзяржаў запрашаюць на адпачынак і аздараўленне ў Беларусь штогод з 2017 года, за час дзеяння праграмы ёю скарысталіся 2,5 тыс. дзяцей з-за мяжы. Адзначаецца, што “гэта спрыяе ўмацаванню даверу і ўзаемаразумення ў адносінах з дружалюбнымі краінамі, а таксама развіццю супрацоўніцтва ў гуманітарна-адукацыйнай сферы”.

“Зубраня” знаходзіцца ў Мядзельскім раёне Мінскай вобласці на тэрыторыі Нацыянальнага парка “Нарачанскі”.