Палата прадстаўнікоў ухваліла допуск да дзяржсакрэтаў кіраўніцтва УНС і старшыні ЦВК

14 траўня, Позірк. Папраўкі ў закон “Аб дзяржаўных сакрэтах” ухваліла 14 траўня ў двух чытаннях Палата прадстаўнікоў Нацыянальнага сходу (ПП НС).

Прэс-служба ніжняй палаты парламента адзначае, што законапраектам прапануецца даць допуск да дзяржаўных сакрэтаў старшыні, членам прэзідыума і начальніку сакратарыята Усебеларускага народнага сходу (УНС), а таксама старшыні Цэнтральнай выбарчай камісіі.

Згодна з дзейным законам аб дзяржсакрэтах, пералік звестак, якія могуць быць аднесены да такіх, шырокі. Ён уключае ў сябе даныя ў галіне палітыкі, эканомікі, фінансаў, навукі і тэхнікі, у ваеннай сферы, у галіне выведвальнай, контрвыведвальнай і аператыўна-вышуковай дзейнасці і інш.

Згодна з артыкулам 3751 Крымінальнага кодэкса Беларусі, “незаконныя збіранне альбо атрыманне звестак, якія складаюць дзяржаўныя сакрэты Рэспублікі Беларусь, а роўна звестак, якія складаюць дзяржаўныя сакрэты іншых дзяржаў, перададзеных Рэспубліцы Беларусь у адпаведнасці з заканадаўствам Рэспублікі Беларусь, з мэтай іх распаўсюджвання пры адсутнасці прыкмет здрады дзяржаве або шпіянажу” караюцца “штрафам, або арыштам, або абмежаваннем волі на тэрмін да трох гадоў, або пазбаўленнем волі на тэрмін да двух гадоў”.

Калі гэтыя ж дзеянні здзейсненыя з выкарыстаннем спецыяльных тэхнічных сродкаў альбо пацягнулі цяжкія наступствы, пакаранне можа дасягаць пяці гадоў абмежавання або пазбаўлення волі.

З красавіка 2024 года старшынёй УНС з’яўляецца Аляксандр Лукашэнка.