За тыдзень Беларусь па бязвізе наведала больш за 4 тыс. еўрапейцаў — Дзяржпагранкамітэт

19 траўня, Позірк. З 12 па 19 траўня Беларусь у бязвізавым парадку наведала 4.090 жыхароў дзяржаў Еўропы (3.975 за тыдзень з 5 па 12 траўня), вынікае з інфармацыі Дзяржаўнага пагранічнага камітэта.

За тыдзень у краіну прайшло 1.566 грамадзян Літвы (1.474), 1.360 грамадзян і неграмадзян Латвіі (1.312), 449 грамадзян Польшчы (478) і 715 грамадзян — прадстаўнікоў іншых еўрапейскіх дзяржаў (711).

Усяго з 15 красавіка 2022 года Беларусь наведала 1.107.314 жыхароў Еўропы. З Латвіі прыбыло 349.215 замежнікаў, з Літвы — 618.576, з Польшчы — 112.664.

Бязвізавы рэжым дзейнічае з 15 красавіка 2022 года для жыхароў Латвіі і Літвы, з 1 ліпеня таго ж года — для жыхароў Польшчы. 19 ліпеня 2024 года беларускія ўлады распаўсюдзілі бязвізавы рэжым на грамадзян яшчэ 35 краін Еўропы, ім за гэты час скарысталіся 26.144 чалавекі.

Гаворка пра жыхароў Аўстрыі, Андоры, Бельгіі, Балгарыі, Босніі і Герцагавіны, Ватыкана, Вялікабрытаніі, Венгрыі, Германіі, Грэцыі, Даніі, Ірландыі, Ісландыі, Іспаніі, Італіі, Кіпра, Ліхтэнштэйна, Люксембурга, Мальты, Манака, Нідэрландаў, Нарвегіі, Партугаліі, Румыніі, Сан-Марына, Паўночнай Македоніі, Славакіі, Славеніі, Фінляндыі, Францыі, Харватыі, Чэхіі, Швейцарыі, Швецыі і Эстоніі.

Грамадзяне гэтых дзяржаў могуць уязджаць у Беларусь без візы праз усе наземныя і паветраныя міжнародныя пункты пропуску “на падставе сапраўдных дакументаў”, знаходзіцца на беларускай тэрыторыі “не больш за 30 сутак з дня ўезду”.

13 снежня 2024 года бязвіз для жыхароў 38 еўрапейскіх краін падоўжаны да канца 2025-га.