19 траўня, Позірк. 41% расіян назвалі Беларусь найбольш сяброўскай краінай для РФ — на 8 працэнтных пунктаў менш, чым у 2022 годзе, вынікае з вынікаў апытання, праведзенага Усерасійскім цэнтрам вывучэння грамадскай думкі (УЦДГМ).
Самай сяброўскай дзяржавай расіяне лічаць Кітай, такога меркавання прытрымліваюцца 65% апытаных (+10 п.п.).
На трэцім і чацвёртым месцах — Індыя (26%, +4 п.п.) і КНДР (26%, +22 п.п.).
Самай недружалюбнай краінай названая Францыя, такой яе вызначыла 48% рэспандэнтаў (+27 п.п. у параўнанні з 2022-м), далей ідуць Вялікабрытанія (42%, +3 п.п.) і Германія (41%, +9 п.п.).
“Беларусь — найбольш цесны і надзейны саюзнік Расіі на постсавецкай прасторы. У адрозненне, напрыклад, ад Турцыі і Казахстана, грамадскае ўспрыманне якіх схільнае да ваганняў, Беларусь — стабільна другі па згадвальнасці саюзнік Расіі ва ўспрыманні нашых суграмадзян”, — гаворыцца ў даследаванні.
Звяртаецца ўвага на “адлігу расійска-амерыканскіх адносін” пасля прыходу да ўлады прэзідэнта Дональда Трампа. “Упершыню за ўсю гісторыю маніторынгу ЗША саступілі лідарства ў рэйтынгу нядобразычліўцаў адразу тром еўрапейскім краінам, <…> што шмат у чым абумоўлена зменай улады за акіянам і рыторыкі па ўрэгуляванні ўкраінскага крызісу”, — заяўляюць аўтары апытання.
“Што тычыцца Украіны”, адзначаецца ў даследаванні, то з пачаткам вайны “расіяне сталі радзей успрымаць яе краінай-нядобразычліўцам — за апошнія тры гады яна апусцілася з другой на чацвёрты радок рэйтынгу антыпатый”. “Гэты парадокс, з аднаго боку, тлумачыцца сілай ідэі аб “брацкім народзе”, якая па-ранейшаму захоўвае ўстойлівасць у грамадскай свядомасці, з другога — разуменнем мэтаў “сва”, галоўнай з якой ва ўяўленні расіян з’яўляецца не столькі змена палітычнага курсу Украіны і тым больш яе акупацыя, колькі абарона Расіі і раззбраенне суседа. Акрамя таго, на такія ацэнкі ўплывае і няздольнасць краіны дзейнічаць самастойна на сусветнай арэне”, — заяўляе УЦДГМ.
УЦДГМ — адзін з найбуйнейшых сацыялагічных цэнтраў Расіі. Створаны ў 1987 годзе. Цяпер 100% акцый кампаніі належаць расійскай дзяржаве.
