Па крымінальных справах СК 77 грамадзян асуджана за “здраду дзяржаве“, 6 тыс. — за “экстрэмізм“

19 траўня, Позірк. Па крымінальных справах, якія ўзбудзіў Следчы камітэт, 77 асоб асуджана за “здраду дзяржаве“, паведаміў старшыня СК Дзмітрый Гара на юрыдычным форуме “Права: урокі мінулага для свету будучыні” 19 траўня ў Санкт-Пецярбургу.

Паводле яго сцвярджэння, следчыя ўстанавілі і сабралі доказы, што дазволілі “прыцягнуць да адказнасці больш за 6 тыс. экстрэмістаў, якія выношвалі план гвалтоўнага захопу ўлады“.

У дачыненні да пяці кіраўнікоў палка Каліноўскага, прызнанага беларускім рэжымам “тэрарыстычнай арганізацыяй”, у парадку спецыяльнай вытворчасці вынесеныя абвінаваўчыя прысуды на тэрмін пазбаўлення волі ад 12 да 20 гадоў.

Шэсць чалавек заключана пад варту, 125 абвешчана ў вышук, сказаў Гара.

Маштабны пратэст супраць фальсіфікацыі вынікаў прэзідэнцкіх выбараў 2020 года на карысць Аляксандра Лукашэнкі ён назваў “выкарыстаннем нацысцкіх ідэй і сімволікі“ і “спробай дзяржаўнага перавароту“. Завадатары нібыта “паводле прыкладу нацыстаў і іх памагатых для арганізацыі масавых беспарадкаў прыцягнулі ў свае шэрагі маргіналаў і крымінальнікаў“.

“Асноўная мэта спробы дзяржаўнага перавароту ў 2020 годзе было звяржэнне канстытуцыйнага ладу і фармаванне марыянеткавай нацыяналістычнай дзяржавы — стварэнне з Беларусі “антыРасіі“, — заявіў Гара, скарыстаўшы вызначэнне расійскіх прапагандыстаў і імперыялістаў у дачыненні да Украіны, у якую тая нібыта збіралася ператварыцца ў выпадку сыходу на Захад.

Пасля сфальсіфікаваных прэзідэнцкіх выбараў 2020 года Беларусь знаходзіцца ў глыбокім грамадска-палітычным крызісе, не спыняюцца рэпрэсіі небывалага маштабу. Парушэнні правоў чалавека, прымусовая пасадка ў Мінску транзітнага замежнага пасажырскага самалёта, арганізацыя міграцыйнага крызісу, а таксама дапамаганне Расіі ў яе вайсковай агрэсіі супраць Украіны фактычна ізалявалі Беларусь пад кіраваннем рэжыму Лукашэнкі ад дэмакратычнага свету і дазволілі Крамлю ўзмацніць свой уплыў на яе.