Затрыманы жыхар Мінскай вобласці, які захоўваў дома вінтоўку, стрэльбу, карабін, мноства аўтаматных патронаў

20 траўня, Позірк. Супрацоўнікі ГУБАЗіК “пры сілавой падтрымцы байцоў <…> унутраных войскаў МУС” затрымалі 43-гадовага жыхара Пухавіцкага раёна, які захоўваў дома некалькі адзінак зброі і патроны да яе, вынікае з паведамлення прэс-службы Міністэрства ўнутраных спраў.

Паводле інфармацыі ведамства, мужчына захоўваў больш за 2.000 аснашчаных трасавальнымі кулямі патронаў да аўтамата Калашнікава. У яго таксама вынятыя вінтоўка, стрэльба, карабін і больш за 300 патронаў.

МУС сцвярджае, што “высветленае дачыненне фігуранта да незаконнага вырабу і збыту боепрыпасаў”.

Следчы камітэт распачаў крымінальныя справы. Мужчына змешчаны ў ізалятар часовага ўтрымання. Яму пагражае да 10 гадоў пазбаўлення волі.

ГУБАЗіК, як заяўляе міністэрства, пастаянна праводзіць “аператыўна-прафілактычныя мерапрыемствы, скіраваныя на высвятленне і выкрыццё асоб, што маюць дачыненне да незаконнага абароту зброі і боепрыпасаў”.

5 траўня Генпракуратура перадала ў суд крымінальную справу мужчыны, які “з дапамогай нявызначаных слясарных інструментаў”, а таксама 3D-прынтару вырабіў дзевяціміліметровы пісталет-кулямёт FGC9 версіі MkII.

7 траўня стала вядома, што гродзенская рэгіянальная мытня ўзбудзіла справу ў дачыненні да 42-гадовага грамадзяніна Беларусі, які спрабаваў увезці ў краіну 4 кг пораху.

13 траўня паведамлялася, што пракуратура Івацэвіцкага раёна (Брэсцкая вобласць) накіравала ў суд крымінальную справу 47-гадовага мясцовага жыхара, якому інкрымінавана незаконнае “набыццё, нашэнне і захоўванне агнястрэльнай зброі, у тым ліку здзейсненыя паўторна”.