Амаль 4 тыс. чалавек прызнана палітвязнямі з 2020 года — “Вясна”

21 траўня, Позірк. З 2020 года крымінальнаму пераследу паводле палітычных матываў у Беларусі падвергнулася больш за 7 тыс. чалавек, паведаміў праваабарончы цэнтр “Вясна” 21 траўня ў аглядзе, прымеркаваным да Дня салідарнасці з палітвязнямі.

На 21 траўня статус палітвязняў мае 1.189 чалавек (1.029 мужчын і 160 жанчын), усяго з 2020-га такімі было прызнана 3.940 чалавек.

Памілаванне ўжытае да 300 палітвязняў, 2.716 цалкам адбылі тэрмін пакарання і выйшлі на волю.

Восем палітвязняў знаходзіцца без сувязі са знешнім светам (інкамунікада), столькі ж памерла ў зняволенні, у “асаблівай рызыцы” знаходзіцца 206 чалавек.

За салідарнасць з палітвязнямі асуджана 34 чалавекі, адзначаецца ў аглядзе.

Паводле крымінальных артыкулаў за данаты, паводле даных праваабаронцаў, асуджана 114 чалавек, 218 — за падтрымку Украіны.

166 палітвязняў пераведзена на турэмны рэжым будучы асуджанымі паводле арт. 411 КК (злоснае непадпарадкаванне адміністрацыі калоніі).

Міжнародны дзень салідарнасці з беларускімі палітычнымі зняволенымі заснаваны праваабарончым рухам і адзначаецца 21 траўня. Менавіта ў гэты дзень у 2021 годзе палітвязень Вітольд Ашурак памёр у шклоўскай калоніі № 17 (Магілёўская вобласць) пры загадкавых абставінах.