На пажары ў Старадарожскім раёне загінулі 54 цяляці

23 траўня, Позірк. Пра гібель на пажары 54 цялят паведамляе прэс-служба Міністэрства па надзвычайных сітуацыях.

Узгаранне адбылося днём 22 траўня ў будынку цялятніка на тэрыторыі малочна-таварнага комплексу каля аграгарадка Паставічы Старадарожскага раёна (Мінская вобласць).

Паводле даных МНС, акрамя жывёл агнём знішчана 300 кв. м ПВХ-палатна, пашкоджана 500 кв. м ПВХ-палатна, 50 кв. м лачання металічнага даху і 80 боксаў (1,5х2 м кожны) для цялят.

Гэта не першае ў 2025 годзе падобнае здарэнне на фермах.

Раней “Позірк” паведамляў, што за дзесяць дзён (з 19 па 28 красавіка) на малочна-таварных фермах адбылося шэсць пажараў, на якіх загінулі чатыры і пацярпелі пяць цялятаў.

Акрамя таго, 13 і 18 траўня было зарэгістравана два пажары на аб’ектах АПК, у выніку якіх было знішчана 5 тон саломы і 2 тоны сена.

Паводле падлікаў, якія вядзе “Позірк”, з пачатку года знішчана або пашкоджана мінімум дзевяць адзінак сельскагаспадарчай тэхнікі і абсталявання.