Віцэ-прэм’ер Шулейка заявіў аб укараненні лічбавых тэхналогій у галіне “дакладнага земляробства”
3 чэрвеня, Позірк. Аб укараненні ў беларускай сельскай гаспадарцы лічбавых тэхналогій заявіў 3 чэрвеня на міжнароднай спецыялізаванай выставе “Белагра-2025” намеснік прэм’ер-міністра Юрый Шулейка.
“Мы паступальна пачынаем працаваць з гэтай тэматыкай”, — сказаў віцэ-прэм’ер (паводле відэа ў тэлеграм-канале ўрада).
Паводле слоў Шулейкі, “ёсць асноватворны дакумент”, згодна з якім адабраны “шэраг гаспадарак” — яны “будуць працаваць у сістэме дакладнага земляробства”.
“Гэта значыць лічбавізацыя, — сказаў чыноўнік. — Мы адлічбуем палі. Мінпрам рыхтуе адпаведную тэхніку. І мы пачынаем працаваць у новых умовах, каб сёння максімальна атрымаць эканамічны вынік”.
Важна разумець, дадаў Шулейка, што “вясковага насельніцтва становіцца менш, узровень тэхнікі, забяспечанасці тэхнічнай расце”. “Значыць, нам неабходна сёння вучыцца і імкнуцца працаваць у гэтых новых умовах. Гэта будучыня. <…> Мы ставім сабе амбіцыйныя задачы, каб рухацца ў кірунку лічбавізацыі сельскай гаспадаркі. І дакладна ў земляробстве”, — падкрэсліў віцэ-прэм’ер.
Выстава “Белагра-2025” праходзіць у Мінску з 3 чэрвеня. Паводле даных дзяржСМІ, у ёй прыме ўдзел 545 кампаній з 14 краін, экспазіцыю складуць звыш 500 адзінак тэхнікі і абсталявання для сельскай гаспадаркі, харчовай і перапрацоўчай галіны.
Урад зацвердзіў канцэпцыю лічбавага суверэнітэту для "мінімізацыі санкцыйнага ціску"
15 студзеня, Позірк. Канцэпцыю забеспячэння суверэнітэту ў сферы лічбавага развіцця да 2030 года зацвердзіў урад Беларусі. Адпаведная пастанова № 1074 апублікаваная 15 студзеня на Нацыянальным прававым інтэрнэт-партале. Дакумент, як заяўляецца, "адлюстроўвае бачанне развіцця" Беларусі "ва ўмовах хуткай дынамікі лічбавых пераўтварэнняў …
