Новы навальнічны фронт прывёў да пашкоджання ЛЭП у Брэсцкай вобласці і парушэння руху транспарту ў Мінску

8 чэрвеня, Позірк. Да парушэння жыццядзейнасці ў асобных раёнах краіны прывёў новы навальнічны фронт увечары 7 чэрвеня і ў ноч на 8 чэрвеня, вынікае з паведамленняў дзяржструктур.

Паводле інфармацыі прадпрыемства “Брэстэнэрга“, навальніца і моцныя парывы ветру абясточылі спажыўцоў у “асобных населеных пунктах Брэсцкага і Маларыцкага раёнаў”. “Энэргетыкі прыступілі да аднаўлення пашкоджаных ліній электраперадачы адразу пасля спынення дажджу і ветру“, — адзначаецца ў прэс-рэлізе.

У Мінску быў парушаны рух дзевяці тралейбусных і аднаго аўтобуснага маршрутаў, у тым ліку на Партызанскім праспекце, вуліцах Гарадзецкай, Карастаянавай, бульвары Шаўчэнкі. Лівень пачаўся каля паўночы, калі грамадскі транспарт практычна ўжо не працуе.

5 чэрвеня непагадзь парушыла электразабеспячэнне 223 населеных пунктаў Мінскай вобласці, у сталіцы парушаўся рух грамадскага транспарту па 96 маршрутах.

На 8 чэрвеня штармавое папярэджанне Белгідрамет абвясціў для паўднёвага ўсходу краіны, дзе чакаюцца навальніцы, ліўні, град, узмацненне ветру да 20 м/с.