Праз непагадзь 8 і 9 чэрвеня парушалася электразабеспячэнне 72 паселішчаў Гомельскай вобласці

9 чэрвеня, Позірк. Моцны вецер парывамі да 20 метраў на секунду, залевы і навальніцы 8 і 9 чэрвеня прывялі да парушэння электразабеспячэння ў 72 населеных пунктах Гомельскай вобласці, паведамляе прадпрыемства “Гомельэнерга”.

Найбольш праз непагадзь пацярпелі Гомельскі, Мазырскі і Рэчыцкі раёны.

Прычынамі адключэнняў сталі абрывы правадоў ліній электраперадачы, выкліканыя падзеннем дрэў, а таксама пашкоджанне апор і іншых элементаў ЛЭП.

Да ліквідацыі пашкоджанняў прыцягнулі 16 брыгад адмыслоўцаў і восем адзінак спецтэхнікі. Да 13:15 электразабеспячэнне цалкам аднавілі.

Паводле інфармацыі прадпрыемства “Мінэнерга”, электрычнасць знікала таксама ў паселішчах Мінскай вобласці, аднак усе пашкоджанні ліквідавалі яшчэ 8 чэрвеня.

Разам з тым супрацоўнікі Міністэрства па надзвычайных сітуацыях працягваюць ліквідаваць наступствы непагадзі. Паводле аператыўных звестак МНС, за апошнія суткі ў выніку “праходжання моцных залеваў і шквалістага ўзмацнення ветру з парывамі 15–20 м/с” у Гомельскай вобласці зафіксавана 9 выпадкаў падзення дрэў, Мінскай — 2. Пашкоджаныя тры аўтамабілі ў Мазыры (Гомельская вобласць).

Праз моцныя навальніцы на 9 чэрвеня Белгідрамет абвясціў аранжавы ўзровень небяспекі.