Рыжанкоў і Лаўроў абмеркавалі ў Маскве магчымы ўдзел Беларусі ў перамовах аб міры ва Украіне

10 чэрвеня, Позірк. Пытанні “вырашэння ўкраінскага крызісу, магчымага ўдзелу Рэспублікі Беларусь у дасягненні мірнага ўрэгулявання” абмеркавалі на сустрэчы ў Маскве міністры замежных спраў Беларусі і Расіі Максім Рыжанкоў і Сяргей Лаўроў.

Пра гэта на брыфінгу 10 чэрвеня паведаміў Рыжанкоў, відэа яго выступу апублікаванае на сайце МЗС РФ.

Паводле слоў кіраўніка беларускага знешнепалітычнага ведамства, на перамовах таксама абмяркоўваліся “перспектывы трывалага і справядлівага міру ў Еўропе ў цэлым і пабудовы новай архітэктуры сістэм бяспекі на агульнаеўразійскай прасторы”.

Рыжанкоў выказаў “асаблівую падзяку” Расіі “за аператыўнае і вычарпальнае інфармаванне пра кантакты ўкраінскага боку з ЗША і партнёрамі ў Еўрапейскім саюзе”, за імкненне МЗС РФ “пачуць, улічыць меркаванне Мінска адносна працэсаў, якія адбываюцца сёння”.

“За два дні перамоў у вузкім і пашыраным фармаце мы абмеркавалі ўвесь спектр двухбаковага ўзаемадзеяння, уключаючы рэалізацыю рашэнняў, прынятых у рамках Саюзнай дзяржавы, а таксама і міжнародны парадак дня, практычна да дробязяў разабралі, а аказваецца ў нас яго шмат”, — падсумаваў Рыжанкоў свой візіт, які праходзіў 9–10 чэрвеня.

Украінскі прэзідэнт Уладзімір Зяленскі назваў немагчымым правядзенне перамоў з Расіяй у Беларусі, паколькі Беларусь для Украіны — “краіна, з якой паляцелі ракеты”, “заходзілі войскі”, адпаведна, яна з’яўляецца саюзнікам РФ, якая напала на Украіну.

Аляксандр Лукашэнка і прадстаўнікі яго рэжыму неаднаразова заяўлялі, што могуць прыняць у сябе перагаворныя дэлегацыі Украіны і РФ. Пры гэтым сваю ролю яны ацэньваюць супярэчліва, то выказваючы гатоўнасць стаць пасярэднікам, то катэгарычна ад гэтага адмаўляючыся.

24 лютага 2022 года Расія развязала поўнамаштабную вайну супраць Украіны, у якой афіцыйны Мінск падтрымлівае Крэмль. Нягледзячы на тое, што беларуская тэрыторыя і інфраструктура выкарыстоўваліся для нападу, некалькі раўндаў перамоў паміж Масквой і Кіевам напачатку вайны прайшлі менавіта ў Беларусі.

Пазней прадстаўнікі рэжыму ў Мінску неаднаразова заяўлялі, што Беларусь павіная быць прадстаўленая на мірных перамовах паміж РФ і Украінай.