За мінулыя суткі ў Беларусі патанула два чалавекі — АСВОД

11 чэрвеня, Позірк. Два чалавекі патанула 10 чэрвеня, паведамляе прэс-служба Беларускага рэспубліканскага таварыства ратавання на водах (АСВОД).

Напярэдадні Міністэрства па надзвычайных сітуацыях прадставіла інфармацыю, паводле якой ад пачатку траўня ў Беларусі патануў 31 чалавек.

Людзі гінулі пры купанні (1), у выніку аварыі маламернага судна (1), пры лоўлі рыбы з чаўна (3) і берага (7), ад падзення ў ваду (7) і з іншых прычын.

За аналагічны леташні перыяд пры купанні патанула 16 чалавек. Такую вялікую розніцу ў МНС звязваюць у першую чаргу з умовамі надвор’я — сёлета яны пакуль не дазволілі “паўнавартасна адкрыць новы купальны сезон”.

Асноўнымі прычынамі ўсіх трагедый на вадзе ў міністэрстве лічаць “асабістую бестурботнасць і нізкі ўзровень культуры бяспекі жыццядзейнасці”. Што да дзяцей, то яны, як правіла, гінуць, калі застаюцца адныя — без нагляду дарослых.

У Беларусі вызначана 495 дазволеных месцаў для купання, дзе ў абавязковым парадку дзяжураць ратавальнікі МНС і АСВОД. У той жа час маецца больш за 3 тыс. месц, дзе купацца забаронена.