У Бяла-Падлясцы затрыманы беларус, які кіраваў аўто ў стане наркатычнага ап’янення

20 чэрвеня, Позірк. Паліцыя польскага горада Бялай Падляскі (Люблінскае ваяводства) 20 чэрвеня паведаміла пра арышт пяці мужчын, якія наносілі графіці на апоры моста на нацыянальнай дарозе № 2 (мяжа з Германіяй — мяжа з Беларуссю).

Адзначаецца, што на месцы здарэння супрацоўнікі паліцыі заўважылі аўтамабіль BMW, якім кіраваў 32-гадовы грамадзянін Беларусі. У аўтамабілі таксама знаходзіўся 20-гадовы хлопец. У абодвух мужчын быў выяўлены амфетамін, а кіроўца знаходзіўся ў стане наркатычнага ап’янення, гаворыцца ў рэлізе.

На адной з апор моста супрацоўнікі паліцыі заўважылі 25-гадовага мясцовага жыхара, які маляваў на сцяне графіці з дапамогай балончыка. Там жа знаходзіліся 30-гадовы і 27-гадовы жыхары Бялай Падляскі, у апошняга супрацоўнікі паліцыі знайшлі марыхуану.

“Мужчын затрымалі, ім ужо прад’яўлены абвінавачванні. Паводле дзейных нормаў, злачынства, звязанае з пашкоджаннем маёмасці, караецца пазбаўленнем волі на тэрмін да пяці гадоў. Захоўванне наркотыкаў караецца пазбаўленнем волі на тэрмін да трох гадоў. Вадзіцелю, які кіраваў транспартным сродкам у стане наркатычнага ап’янення, можа пагражаць пакаранне ў выглядзе абмежавання або пазбаўлення волі на тэрмін да трох гадоў”, — паведаміла паліцыя.