BEROC: Павышэнне Нацбанкам стаўкі рэфінансавання — моцна запозненая мера
25 чэрвеня, Позірк. Рашэнне Нацыянальнага банка аб павышэнні стаўкі рэфінансавання з 9,5 да 9,75% з’яўляецца эканамічна абгрунтаванай, але “моцна запозненай” мерай, заявіў на брыфінгу 25 чэрвеня старшы навуковы супрацоўнік даследчага цэнтра BEROC Анатоль Харытончык.
На яго думку, рашэнне Нацбанка “адпавядае сітуацыі, якая склалася ў эканоміцы, у прыватнасці, яе перагрэву, інфляцыйнага ціску”, але яно “павінна было прымацца яшчэ ў другой палове 2023 года”.
Эксперт звярнуў увагу на нязначнасць змянення стаўкі, адзначыўшы, што такое павышэнне “носіць абсалютна сімвалічны характар”, бо з улікам інфляцыі стаўка ў рэальным выражэнні “нават знізілася”.
“Непрадказальная і супярэчлівая манетарная палітыка можа весці да павышэння ўзроўню інэрцыйнасці інфляцыйных чаканняў, ўскладнення інвестыцыйнага планавання і прагназавання, што спараджае рызыкі яшчэ большага зніжэння эфектыўнасці грашова-крэдытнага рэгулявання”, — сказаў Харытончык.
Рашэнне аб павышэнні стаўкі рэфінансавання з 25 чэрвеня з 9,5 да 9,75% гадавых было прынятае 23 чэрвеня па выніках пасяджэння праўлення Нацыянальнага банка, прысвечанага развіццю сітуацыі ў эканоміцы і грашова-крэдытнай сферы.
Прычынамі прэс-служба рэгулятара назвала “рызыкі, звязаныя з падвышанай траекторыяй інфляцыі”, а таксама “стымуляванне інвестыцыйнай актыўнасці”.
“Аналіз паказвае, што, нягледзячы на захаванне станоўчай дынамікі эканамічнага росту, узмацняецца макраэканамічны дысбаланс, выкліканы нарошчваннем разрыву паміж тэмпамі росту прадукцыйнасці працы і заработнай платы”, — заявіў старшыня праўлення Нацбанка Раман Галоўчанка.
