Памілавана яшчэ 16 зняволеных, якія ўчынілі “злачынствы ў тым ліку экстрэмісцкай накіраванасці” (дапоўнена)

2 ліпеня, Позірк. Аб памілаванні 16 зняволеных паведаміла 2 ліпеня прэс-служба Аляксандра Лукашэнкі.

“Гэта асуджаныя, якія ўчынілі розныя злачынствы, у тым ліку экстрэмісцкай накіраванасці”, — гаворыцца ў паведамленні.

Адзначаецца, што сярод памілаваных восем жанчын і восем мужчын, трое старэйшыя за 50 гадоў, усе вызваленыя “раскаяліся ў зробленым і ўзялі на сябе абавязацельства не парушаць закон”.

Заяўляецца,што памілаванне прымеркавана да Дня незалежнасці, які адзначаецца 3 ліпеня.

Практыка вызвалення палітвязняў працягваецца ў Беларусі роўна год. Першае памілаванне таксама было прымеркавана да Дня незалежнасці. Тады праваабаронцы паведамлялі аб выхадзе 18 палітвязняў. Старшыня Вярхоўнага суда Валянцін Сукала заяўляў пра 14 вызваленых.

З ліпеня 2024 года было адзінаццаць хваляў памілаванняў, у выніку якіх на волю выйшла больш за 300 палітвязняў. Папярэдняе памілаванне датаванае 7 траўня — Лукашэнка вызваліў 42 чалавекі, прымеркаваўшы гэта да 80-годдзя перамогі ў Другой сусветнай вайне.

Разам з тым палітычныя рэпрэсіі ў Беларусі працягваюцца. Людзей затрымліваюць і судзяць у крымінальным парадку паводле палітычных матываў.

На 2 ліпеня беларуская праваабарончая супольнасць прызнае палітвязнямі 1.164 чалавекі. У рэчаіснасці людзей, якія падвергліся рэпрэсіям у той ці іншай форме, значна больш.

14 палітвязняў, уключаючы Сяргея Ціханоўскага і замежных грамадзян, было вызвалена і вывезена за мяжу 21 чэрвеня. Аб іх памілаванні не паведамлялася.