Перакрыты чарговы канал пастаўкі псіхатропаў з РФ у Беларусь, наркакур’ерам пагражае да 15 гадоў пазбаўлення волі — ДМК

3 ліпеня, Позірк. Канал пастаўкі з Расіі ў Беларусь асабліва небяспечных псіхатропных рэчываў перакрыты Віцебскай мытняй сумесна з наркакантролем УУС Гродзенскага аблвыканкама, паведаміла прэс-служба Дзяржаўнага мытнага камітэта (ДМК).

Наркакур’ераў — 50-гадовую жыхарку Гродна і 63-гадовага жыхара Мінскага раёна — затрымалі пад Полацкам (Віцебская вобласць) пры правядзенні аператыўна-вышуковых мерапрыемстваў “пры сілавой падтрымцы байцоў спецпадраздзялення “Алмаз“.

У аўтамабілі, на якім рухаліся затрыманыя, выяўлена 1,3 кг псіхатропнага рэчыва 4-СМС, якое, як сцвярджаецца ў рэлізе, яны збіраліся збыць у Гродне. Перад гэтым партыю планавалася падзяліць на дозы, стварыць для іх утойвання схованкі, каардынаты якіх неабходна было перадаць канчатковым атрымальнікам.

У дачыненні да затрыманых распачатая крымінальная справа паводле ч. 3 арт. 328 Крымінальнага кодэкса (незаконны абарот наркатычных сродкаў, псіхатропных рэчываў, іх прэкурсораў і аналагаў). Ім пагражае да 15 гадоў пазбаўлення волі.

6 траўня ў Мінску завяршыўся “комплекс мерапрыемстваў аператыўных супрацоўнікаў органаў памежнай службы ў затрыманні ўдзельнікаў злачыннай групы”, у выніку чаго было затрымана двое грамадзян Беларусі, якія працавалі на інтэрнет-краму. У іх абавязкі ўваходзіла перамяшчэнне з тэрыторыі Расіі і распаўсюд псіхатропных рэчываў.

2 ліпеня МУС паведаміла, што з пачатку 2025 года на тэрыторыі Беларусі спынена дзейнасць 22 інтэрнэт-наркамаркетаў, перакрыта 24 каналы паступлення забароненых рэчываў, “за збыт дурману ў інтарэсах гандлёвых пляцовак затрыманыя звыш 500 чалавек“.

Паводле звестак ДМК, у 2024 годзе канфіскавана 1.622 тоны наркатычных сродкаў і псіхатропных рэчываў — амаль у два разы больш, чым за папярэдні год. Зафіксавана 553 факты кантрабанды і незаконнага абароту наркотыкаў, узбуджана 310 крымінальных спраў — на 13% больш, чым у 2023-м.

У 2024 годзе з незаконнага абароту было канфіскавана амаль дзве тоны наркотыкаў, псіхатропаў і іх прэкурсораў. Канфіскаваная колькасць наркотыкаў у два разы большая, чым годам раней, паведаміў міністр унутраных спраў Іван Кубракоў. Раней ён заявіў, што ў 2023 годзе было канфіскавана больш за тону наркотыкаў, што амаль у 6 разоў больш, чым у 2022-м.

Летась у лістападзе аб’яднанне BelPol на аснове аналітычнай даведкі МУС, якая трапіла ў яго распараджэнне, паведаміла, што галоўным пастаўшчыком наркотыкаў і псіхатропаў у Беларусь з’яўляецца Расія. З дакумента вынікала, што ў першай палове 2024 года ў Беларусі было выяўлена 17 каналаў паставак забароненых рэчываў: у 14 выпадках (82,4%) наркотыкі і псіхатропы паступалі з Расіі, у двух — з Польшчы, у адным — з Літвы.