Генконсульства Беларусі ў Санкт-Пецярбургу пераехала ў гістарычны асабняк, дзе раней працавалі чэшскія дыпламаты
3 ліпеня, Позірк. Генеральнае консульства Беларусі ў Санкт-Пецярбургу афіцыйна пераехала ў новы будынак. Цырымонія адкрыцця адбылася 3 ліпеня пры ўдзеле губернатара горада — суб’екта РФ Аляксандра Беглова, паведамляе ўрадавае выданне “Пецярбургскі дзённік”.
Кіраўнік Санкт-Пецярбурга заявіў, што генконсульства “адкрываецца датэрмінова”.
Намеснік міністра замежных спраў Беларусі Павел Уцюпін выказаў упэўненасць у тым, што “будынак будзе працаваць на карысць” дзвюх краін, “умацоўваючы братэрскія сувязі паміж Беларуссю і Расіяй”.
Беларускія дыпламаты цяпер будуць працаваць у асабняку Марыі Тэцнер (вул. Цвярская, 5), пабудаваным у 1904 годзе. Адметна, што раней у гэтым будынку месцілася генеральнае консульства Чэхіі (закрытае з канца лютага 2022 года на падставе рашэння Прагі).
Пра пераезд генконсульства ў “больш прасторны будынак” Бяглоў заяўляў 31 ліпеня 2024 года на сустрэчы з амбасадарам Беларусі ў РФ Аляксандрам Рагожнікам.
Неабходнасць у пашырэнні працоўнай плошчы ўзнікла ў сувязі з павелічэннем штата дыпмісіі — праз “рост тавараабароту і колькасці сумесных праектаў, пашырэння гандлёва-эканамічнай і гуманітарнай супрацы паміж Пецярбургам і Беларуссю”.
27 траўня 2025 года ўлады расійскага горада падпісалі дакументы на размяшчэнне беларускага генконсульства ў згаданым будынку.
Генеральнае консульства Беларусі ў Санкт-Пецярбургу пачало працаваць 30 чэрвеня 2023 года на вул. Бонч-Бруевіча, 3, дзе да гэтага размяшчалася аддзяленне беларускай амбасады.
