8 ліпеня, Позірк. Пра правядзенне “комплекснага занятку” з удзелам падраздзяленняў 188-й гвардзейскай інжынернай брыгады Узброеных сіл паведаміла прэс-служба Міністэрства абароны.
За ходам заняткаў, як заяўляецца, “асабіста назіраў” першы намеснік міністра абароны — начальнік Генеральнага штаба Узброеных сіл Павел Муравейка.
“На берагах ракі Днепр асабісты склад адпрацоўвае дзеянні ў складзе ўзвода (роты) па навядзенні моста, абсталяванні і ўтрыманні паромнай і дэсантавай пераправы”, — гаворыцца ў паведамленні.
Адзначаецца, што “вадалазы выконваюць інжынерна-разведвальныя і інжынерна-тэхнічныя задачы ў раёне абсталявання пераправы”.
“Гвардзейцы ўсталёўваюць інжынерныя загароды, прабіваюць праходы ў загародах умоўнага праціўніка і выконваюць размініраванне мясцовасці”, — паведамляе ведамства.
“Асабісты склад іншых падраздзяленняў абсталёўвае акопы і бліндажы, а таксама маскіруе пазіцыі”, — падкрэсліваецца ў рэлізе.
Рэжым Аляксандра Лукашэнкі безупынна праводзіць вучэнні, трэніроўкі і зборы на фоне напружанасці ў дачыненнях з Захадам і поўнамаштабнай вайны Расіі супраць Украіны, у якой афіцыйны Мінск падтрымлівае Крэмль.
