У Літве за паўгода канфіскавана больш за 805 тыс. пачкаў кантрабандных цыгарэт, дастаўленых з Беларусі па паветры

18 ліпеня, Позірк. За першую палову 2025 года ў Літве затрымана і канфіскавана больш за 805 тыс. пачкаў кантрабандных цыгарэт, дастаўленых з Беларусі па паветры, паведамляе партал навін Delfi.

Паводле інфармацыі медыя, даныя былі абнародаваныя па выніках міжведамаснай працоўнай нарады 18 ліпеня, скліканай з ініцыятывы генеральнага пракурора Літвы Ніды Грунскене.

Нараду з прадстаўнікамі Міністэрства ўнутраных спраў, паліцыі і Службы аховы дзяржаўнай мяжы (САДМ) правялі ў сувязі з частымі выпадкамі выкарыстання метэазондаў і дронаў для кантрабанды цыгарэт і іншых тавараў.

Згаданыя ведамствы, паводле інфармацыі Delfi, сцвярджаюць, што многія выпадкі паветранай кантрабанды кваліфікуюцца як сістэматычнае злачыннае дзеянне, якое здзяйсняецца аднымі і тымі ж асобамі, таму падобныя інцыдэнты звычайна расследуюцца ў рамках аб’яднаных дасудовых расследаванняў — як эпізоды аднаго злачынства.

У 2024 годзе і першай палове 2025-га было распачата 20 дасудовых расследаванняў па фактах перавозкі кантрабанды пры дапамозе метэазондаў ці дронаў.

“У агульнай складанасці 34 асобам выстаўленыя абвінавачанні ў рамках дасудовага расследавання такога кшталту. Яшчэ адным значным вынікам гэтага года сталі дзесяць крымінальных спраў, якія цяпер разглядаюцца або ўжо разгледжаны ў судах”, — прыводзіць партал інфармацыю пракуратуры.

Увечары 15 ліпеня супрацоўнікі САДМ з дапамогай адмысловай прылады прызямлілі чарговы беспілотнік, які прыляцеў з боку Беларусі. Дрон, які ўпаў, знайшлі прыкладна за 4 км ад мяжы, грузу і людзей на месцы падзення не было. Як паведамлялася на сайце службы, беспілотнікі падобнага тыпу выкарыстоўваюцца ў асноўным для перавозкі кантрабандных цыгарэт.

Паводле даных САДМ, сёлета літоўскія памежнікі канфіскавалі ўжо 34 дроны, якія, як мяркуецца, выкарыстоўваліся для кантрабанды цыгарэт з Беларусі. Летась кантрабандысты страцілі такім чынам 54 дроны. Акрамя таго, летась было канфіскавана 226 паветраных шароў, якія выкарыстоўваліся для кантрабанды цыгарэт з Беларусі, ад пачатку гэтага года — 348.

10 ліпеня ў паветраную прастору Літвы з боку Беларусі ўляцеў беспілотнік мадэлі “Гербера”. Пасля трох хвілін палёту над літоўскай тэрыторыяй дрон упаў без старонняй дапамогі.

16 ліпеня МЗС Літвы запатрабавала тлумачэнні ад беларускага боку ў сувязі з гэтым інцыдэнтам.