23 ліпеня, Позірк. Міністр замежных спраў Літвы Кястуціс Будрыс не бачыць падстаў разглядаць пытанне аб ануляванні акрэдытацыі “Прадстаўніцтва беларускай дэмакратыі” (дэ-факта Офіса Святланы Ціханоўскай), паведамляе інфармагенцтва BNS.
“Прадастаўлены прадстаўніцтву статус дазваляе яму функцыянаваць, дзейнічаць, выконваць функцыі і мабілізаваць дэмакратычныя сілы”, — заявіў 23 ліпеня кіраўнік літоўскай дыпламатыі.
Як паведамляў “Позірк”, дэпутат Сейма Літвы Вітаўтас Сініца 22 ліпеня адрасаваў Будрысу зварот з просьбай ануляваць акрэдытацыю Офіса Ціханоўскай.
Сініца сцвярджае, што “літоўскай гасціннасцю і добрай воляй” дэмсілы карыстаюцца “не для наладжвання добрасуседскіх адносін, а для стварэння ў Літве нейкай базы для беларусаў” і “альтэрнатыўнай Беларусі”.
23 ліпеня на сайце Ціханоўскай была апублікавана заява яе Офіса ў сувязі з ініцыятывай Сініцы.
Беларуская дэмакратычная супольнасць “шануе падтрымку Літвы, літоўскага ўрада і народа” і ўдзячная Вільнюсу за “шматгадовую падтрымку беларусаў, якія змагаюцца за мірныя дэмакратычныя і еўрапейскія пераўтварэнні ў краіне”, гаворыцца ў каментары.
Адзначаецца, што “ліст дэпутата літоўскага Сейма, які з’явіўся ў публічнай прасторы, утрымлівае недакладную і ілжывую інфармацыю і шкодзіць сяброўскім адносінам паміж літоўскім і беларускім народамі”.
“Раней Дэпартамент дзяржаўнай бяспекі Літвы заяўляў, што пад выглядам “літвінізму” робіцца спроба дыскрэдытаваць дэмакратычныя сілы Беларусі і супрацьпаставіць грамадзян Літвы і беларусаў, якія жывуць у краіне”, — падкрэслівае Офіс Ціханоўскай.
Сініца з’яўляецца заснавальнікам і лідарам літоўскай нацыяналістычнай кансерватыўнай партыі “Нацыянальнае аб’яднанне”. Абраны ў Сейм па аднамандатнай акрузе і з’яўляецца адзіным дэпутатам ад згаданай партыі.
2 ліпеня Святлана і Сяргей Ціханоўскія падчас сустрэчы з Будрысам “падзякавалі Літве за прынцыповую пазіцыю краіны, якая спрыяла нядаўняму вызваленню палітвязняў і ўзмацненню палітычнага ціску Захаду на Беларусь”.
